शनिबार ८ बैशाख, २०८१ | Saturday Apr 20, 2024
काठमाडौं ।कोरोना बीमाको एक लाख ३७ हजार सात सय ५४ वटा दाबी परेसँगै बीमा कम्पनीहरूले १३ अर्ब रूपियाँ भुक्तानी गर्नुपर्ने भएको छ । उक्त दाबी रकम क्षमताभन्दा बढि भएको भन्दै बीमा कम्पनीहरूले २०७८ साउन १४ गतेबाट कोरोना बीमाको दाबी भुक्तानी गर्न असमर्थ रहेको बताएका छन् ।
कम्पनीहरूले आफ्नो भागमा पर्ने जति दायित्व व्यहोरिसकेको र अब बाँकी रहेको दायित्व सरकारको हातमा रहेको तर्क गरेका छन् । बीमा कम्पनीहरूले एक अर्ब, नेपाल पुनर्बीमा कम्पनीले एक अर्ब रूपियाँ, बीमा कम्पनीहरूको महाविपत्ति जगेडा कोषबाट ५० करोड रूपियाँ र बीमा समितिको दायित्वमा पर्नेगरी एक अर्ब रूपियाँ गरी कुल तीन अर्ब ५० करोड रूपियाँ भुक्तानी गर्ने व्यवस्था गरिएको थियो । साथै, बाँकी रहेको सबै रकम सरकारले व्यहोर्ने निर्णय भएको थियो ।
अहिले ठूलो संख्यामा दाबी परेको र सरकारबाट आवश्यक पैसा प्राप्त नभएकाले समस्या सिर्जना भएको बीमा कम्पनीहरूको गुनासो छ । गत साता कम्पनीहरूले कोरोना बीमाको दावी अब भुक्तानी गर्न असमर्थ भयौं भन्दै बीमा समितिमा बुझाएको ज्ञापन पत्रमा २० वटै निर्जीवन बीमा कम्पनीका प्रमुख कार्यकारी अधिकृत (सीईओ)हरूले हस्ताक्षर गरेका छन् ।
अन्तर्राष्ट्रिय बीमा बजारमा महामारीको बीमा हुँदैन् । तर नेपालमा भने परीक्षणको रुपमा कोरोना बीमा योजना ल्याइए पनि महामारीले ठूलो रुप लिएसँगै कम्पनीहरू समस्यामा परेका थिए । समयमा भुक्तानी सल्टाउन नसक्दा यसले बीमा बजारमा नकारात्मक प्रभाव पारेकोे छ ।
