राजधानीमै उद्धारका लागि लामो समय प्रतिक्षा गर्दागर्दै बाढीमा बग्नुपर्ने पीडादायी अवस्था देखियो : पूर्वप्रधानमन्त्री प्रचण्ड

काठमाडौं । पूर्वप्रधानमन्त्री एवंम् नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले बाढी पहिरो जस्तो प्राकृतिक प्रकोपमा परेकाहरुको उद्धारमा सरकार उदासीन देखिएको भन्दै दुःख व्यक्त गरेका छन् ।

बिहीबारदेखि आएको अविरल वर्षा, बाढी पहिरोले देशभर एक सय भन्दा बढीको मृत्यु हुन पुगेको छ भने दजनौं व्यक्तिहरु बेपत्ता छन् । संघीय राजधानी काठमाडौं उपत्यका भित्र नै ५० जना भन्दा बढीको मृत्यु भएसँगै पूर्व प्रधानमन्त्री प्रचण्डले सरकारले उद्धारमा ढिलाई गर्दा ठूलो जनधनको क्षति हुन पुगेको आरोप लगाएका हुन् ।

‘अहिले पनि ठूलो संख्यामा नागरिक बेपत्ता भएकाले उनीहरुको खोजी गर्नु, घाइतेहरुको उपचार गर्नु, घरबारविहीन भएकाहरुलाई सुरक्षित गर्दै पुनस्ुथापना गर्ने काम सुरु गर्नु पहिलो कर्तव्य हुनेछ । तत्काल बेपत्ता नागरिकको खोजी, घाइतेहरुको निःशुल्क उपचार र विस्थापितहरुलाई पुनस्थापनाका लागि सरकारको गम्भीर ध्यानाकर्षण गराउँदछु’ भारी वर्षाको पूर्वाअनुमान हुँदाहुँदै पनि संभावित जोखिम पहिचान गरेर क्षति न्यूनीकरणका लागि सरकारले तत्काल पहलकदमी लिन नसकेकोप्रति दुःख व्यक्त गर्दै अध्यक्ष प्रचण्डले भनेका छन्, ‘राजधानीमै उद्धारका लागि लामो समय प्रतिक्षा गर्दागर्दै बाढीमा बग्नुपर्ने जुन पीडादायी अवस्था देखियो, यसले जनताप्रति सरकारको चरम उदासीनता पुष्टि गर्दछ ।’

अहिले पनि विभिन्न स्थानमा मुख्य राजमार्गसहित सडक, सञ्चार र विद्युतका पूर्वाधार क्षतिग्रस्त अवस्थामा छन् । नेपालीहरुका मुख्य पर्व दशैं तिहार नजिकिएकाले युद्धस्तरमा पुनर्निर्माणका काम थालेर सबै आधारभूत सेवा पूर्ववतरुपमा सञ्चालनका लागि तत्काल पहल अघि बढाउन सरकारको गम्भीर ध्यानाकर्षण गराउँदछु । हाम्रो पार्टीका सम्बन्धित क्षेत्रमा रहनुभएका सबै नेता कार्यकर्ता साथीहरु उद्धार र पुनस्थापनाको काममा लागिरहनुभएको छ । उहाँहरु सबैलाई धन्यवाद दिंदै बेपत्ता नगारिकको खोजी, बिस्थापितहरुको पुनस्थापना, क्षतिग्रस्त संरचनाको पुनर्निर्माण लगायतका कार्यमा निरन्तर लाग्न पुनः निर्देशित गर्दछु’ अध्यक्ष प्रचण्डले विज्ञप्तिमार्फत भनेका छन् ।