काठमाडौंः गृह मन्त्रालयले विशेषगरी तराई क्षेत्रमा सामाजिक कार्यहरुमा प्रयोग बढि हुन थालेको ‘डिजे साउण्ड सिस्टम’ बन्द गर्न स्थानीय प्रशासनहरुलाई निर्देशन दिएको छ ।
जुनसुकै सभा, समारोह, विवाह, ब्रतवन्ध जस्ता कार्यक्रमहरुमा ‘डिजे साउण्ड सिस्टम’को अत्यधिक प्रयोग हुन थालेको र त्यसले ध्वनी प्रदुषण बढाएको भन्दै अधिवक्ता सुनिल रञ्जन सिंहले गृह मन्त्रालयमा उजुरी गरेका थिए ।
चर्को स्वरका यस्ता बाजाहरुले मानव स्वास्थ्यमा नकारात्मक असर पर्ने गरेको भन्दै सिंहले ‘डिजे साउण्ड सिस्टम’को अत्यधिक प्रयोगले विशेषगरी तराईको समाज नै अक्रान्त बनेको निवेदनमा उल्लेख गरेका छन् । यस्ता गतिविधि रोक्न स्थानीय प्रशासनबाट ठोस पहल नभएको भन्दै उनले यस्ता ध्वनी प्रदुषण गर्नेहरुलाई कानुनी कारवाही गर्न माग गरेका थिए ।
मन्त्रालयले जिल्लाहरुलाई पत्र लेख्दै ‘डिजे साउण्ड सिस्टम’ नियन्त्रणका लागि आवश्यक व्यवस्था मिलाउन निर्देशन दिएको छ ।