काठमाडौंः महानगरीय प्रहरी वृत्त दरवारमार्गका सई वीरेन्द्र ऐडीलाई डान्स रेष्टुरेण्ट व्यवसायी कुमार लामाले दुईलाख ऋण लिएवापत ब्याज दिने नाममा अख्तियार दुरुपयोग अनुसन्धान आयोगको फन्दामा पारेको रहस्य बाहिर आएको छ ।
लामाले नयाँ डान्स रेष्टुरेन्ट निर्माण गर्न मासिक दुई हजार ब्याज बुझाउने सर्तमा सई एडीबाट २०७४ साल चैतको अन्तिमतिर दुईलाख नगद ऋण लिएका थिए । सोही ऋणको ब्याज लिन आउनु भन्दै महाराजगञ्जस्थित रिचमण्ड रेष्टुरेन्टमा बोलाई अख्तियारको फन्दामा पारेका हुन ।
अख्तियारका अनुसार सई एडीले आफूले लगानी गरेको दुई लाख नगदको चार महिनाको ब्याज लिने क्रममा यस्तो घटना भएको बयान दिएका छन् ।
ऐडीको वयानमा भनिएको छ– गो–गो बार डान्स रेष्टुरेण्टका सञ्चालक कुमार लामा चिनजानको साथी भनेर दुईलाख ऋण दिएको थिएँ । त्यही ऋणको चार महिनाको मासिक दुई हजारका दरमा ब्याज लिन जाँदा १६ हजार मागेको तर लामाले १६ हजारमा आठहजार प्लस गरी २४ हजार नगद दिएको साँचो हो ।
तर, लामाले भने ऐडीले बारम्वार मासिक दुईहजारका दरमा महिनावारी माग्ने गरेको भन्दै अख्तियारमा ऐडीलाई पक्राउका लागि उजुरी दिएको पाइएको छ । ऐडीले पहिलो पटक लामालाई २०७३ साल भदौमा एकलाख, २०७३ साल कात्तिकमा एकलाख गरी दुईलाख र त्यसपछि २०७४ चैतमा दुई लाख नगद दिएका वयानमा उल्लेख गरेका छन् ।
अनुसन्धानमा संलग्न अख्तियारका अधिकारीका अनुसार उक्त लेनदनेको डान्स रेष्टुरेण्ट व्यवसायी र सई ऐडीबीच कागजी आधार भने केही देखिदैन । ऐडीले भनेका छन् –लामाले पहिलो र दोस्रो पटक दिएको दुईलाख नगदको सावाँ र ब्याज दुबै प्राप्त भइसकेको छ ।
