काठमाडौंः नवनियुक्त संस्कृति, पर्यटन तथा नागरिक उड्डयनमन्त्री रवीन्द्र अधिकारीले निजगढ दोस्रो अन्तराष्ट्रिय विमानस्थल निर्माणले तीव्रता दिने बताएका छन् । पद बहालीका क्रममा शुक्रबार उनले उक्त विमानस्थल निर्माणलाई पहिलो प्राथमिकता दिने बताएका हुन् ।
केही दिनअघि त्रिभुवन अन्तर्राष्ट्रिय विमानस्थलभित्रै एक बंगलादेशी विकास दुर्घटना भएपछि वैकल्पिक अन्तर्राष्ट्रिय विमानस्थलको आवश्यकता खडकिएको बेला अधिकारीले निजगढ विमानस्थलाई तीब्रताका साथ अघि बढाउने बताएका हुन् ।
पदभारको पहिलो नीतिगत निर्णयमा परेको निजगढ विमानस्थललाई चाँडो प्रक्रिया अघि बढाउन निर्देशन पनि उनले दिए । मन्त्रालयका सचिव कृष्णप्रसाद देवकोटाले विभिन्न निर्णय पढेर सुनाउँदै गर्दा मन्त्री अधिकारीले भने, “मुख्य प्राथमिकता निजगढ हो, यो मेरो मात्र भन्ने नठान्नुस् राज्यकै प्राथमिकताको आयोजना पनि हो ।”
त्यसैगरी सन् २०२० लाई नेपाल भ्रमण वर्ष मनाउन ‘भिजिट नेपाल इयर’ एक महिनाभित्र सचिवालय गठन गरी आवश्यक कार्यक्रम तय गरिसक्ने र चीन र भारत केन्द्रीय पर्यटन प्रवद्र्धनलाई तीब्रता दिने मन्त्री अधिकारीको पहिलो निर्णयमा परेका छन् । सन् २०२० मा १५ लाख पर्यटक पुर्याउने गरी भ्रमण वर्ष मनाउन लागेको हो । सन् २०१७ मा १० लाख पर्यटक नेपाल आएका थिए ।
पदभार ग्रहणपछि मन्त्रालय मातहतका निकायलाई निर्देशन दिदैँ मन्त्री अधिकारीले उच्च मनोवल र उच्च स्वाभिानका साथ परिणाम आउनेगरी काम गर्न निर्देशन दिनुभयो ।
