सोमबार ३१ बैशाख, २०८१ | Monday May 13, 2024
काठमाडौं । मुरारका समूह र इण्डियाको सोमानी सेरामिक्स कम्पनीबीच नेपालमा टायल उद्योग स्थापनाका लागि सोमबार सम्झौता भएको छ । दुई अर्ब रुपियाँ लगानी रहने यो उद्योगको कारखाना भैरहवामा रहने छ ।
मुरारका समूहका प्रवन्ध निर्देशक पशुपति मुरारकाले एक बर्षभित्र यो उद्योग स्थापना भई सञ्चालनमा आउने कर्पोरेट नेपाललाई जानकारी दिए । उनले भैरहवामा १३ बिघा क्षेत्रफलमा निर्माण हुने टायल उद्योगले पहिलो चरणमा ३० लाख वर्गमिटर टायल उत्पादन गर्ने बताए ।
त्यसको केही समयपछि दोस्रो चरणमा अर्को ३० लाख वर्गमिटर टायल उत्पादन क्षमता थप्ने योजना रहेको यो उद्योग नेपालको सेरामिकको मागको ३३ प्रतिशत यस उद्योगले पूरा गर्ने योजना रहेको मुरारकाको भनाई छ ।
नेपालमा सेरामिकको माग एक करोड ८० लाख वर्गमिटर छ । अहिले नेपालमा ९५ प्रतिशत टायल आयात हुँदै आएको छ । सम्झौता कार्यक्रममा मुरारकाले मुलुक आर्थिक संकटको स्थिति र व्यवसायिक क्षेत्रमा निराशा रहेको बेला यस लगानीले केही उत्साह जगाउने बताए ।
अर्घाखाँची सिमेन्ट, पशुपति पेन्ट्स लगायतका उद्योगमा लगानी गरेको मुरारका समूहले टायल उद्योगमा लगानी गर्न लागेको हो । सो समूहले टायल उद्योगका लागि सकेसम्म स्वदेशी कच्चा पदार्थ नै गर्ने बताउँदै पछि सोमानीले उत्पादन गर्ने अन्य उत्पादन पनि नेपालमा सुरु गर्ने लक्ष्य लिएको छ ।
सोमानीले इण्डियाका विभिन्न प्रान्तमा उद्योग सञ्चालन गर्दै युरोप, अफ्रिका, मध्यपूर्व, अमेरिका, दक्षिण अमेरिकासम्म आफ्ना उत्पादन बिक्री गर्दै आएको छ ।
