बढ्दैछ अनलाइन ‘टपअप’, ७९ प्रतिशतले घट्यो रिचार्ज कार्डको आयात

काठमाडौं । अनलाइनको माध्यमबाट मोवाइल नम्बरमा व्यालेन्स हाल्न (रिचार्ज गर्न) मिल्ने भएपछि रिचार्ज कार्डको आयात घट्न थालेको छ । चालु आर्थिक बर्ष २०८०–८१ को ९ महिनामा रिचार्ज कार्डको आयात ७९ प्रतिशतले घटेको छ ।

भन्सार बिभागबाट प्राप्त चैत मसान्तसम्मको तथ्यांकले यस्तो देखाएको हो । समीक्षा अवधिमा नेपालका दूरसञ्चार कम्पनीहरुले एक करोड ४१ लाख ६४ हजार रुपियाँ खर्च गरेर २४ हजार ५४३ केजी रिचार्ज कार्ड आयात गरेका छन् । गत आवको सोही अवधीमा उनीहरुले छ करोड ६९ लाख ६४ हजार रुपियाँ खर्च गरेर एक लाख २९ हजार ७९२ केजी रिचार्ज कार्ड आयात गरेका थिए । 

तर, पछिल्लो समय अनलाइनबाटै रिचार्ज गर्न मिल्ने सुविधा आएपछि त्यसको आयात घट्न थालेको छ । साथै, स्वदेशमै गरिने छपाई पनि घटेको टेलीकम कम्पनीहरु बताउँछन् । समग्रमा पछिल्लो समय छपाई रिचार्ज कार्डको प्रयोग स्वाट्टै घटेको जानकारवालाहरु बताउँछन् । 

अहिले मोवाइल बैंकिङ, वालेट, आईपीएस जस्ता डिजीटल भुक्तानीका उपकरणबाट मोवाइल नम्बरमा सिँधै टप अप (रिचार्ज) गर्न मिल्छ । औसतमा ५० प्रतिशत हिस्सामा अनलाइन रिचार्ज हुने गर्छ । यसरी अनलाइन रिचार्जको प्रवृति बढेपछि छपाई रिचार्जको प्रयोग घट्दै गएको दूरसञ्चार कम्पनीहरु बताउँछन् ।

अहिले युवा पुस्ता, व्यवसायीक व्यक्तित्व लगायत प्रविधिमा अभ्यस्त भएका ग्राहकहरुले अनलाइनबाटै मोवाइलमा रिचार्ज गर्न थालेका छन् । दुर्गम ठाउँहरुमा समेत अनलाइनमार्फत रिचार्ज गर्ने प्रवृत्ति बढेको बताइन्छ । दुर्गम ठाउँमा रिचार्ज कार्ड ढुवानी गर्न समय लाग्छ । 

साथै, त्यसको ढुवानी खर्च पनि उच्च हुने गर्छ । त्यसले गर्दा दुर्गम ठाउँमा पनि अनलाइनबाट रिचार्ज गर्ने प्रवृत्ति बढेको कम्पनीहरु बताउँछन् । तर, प्रौढ तथा प्रविधिमा अभ्यस्त नभएका ग्राहकहरुले अझै पनि छपाई रिचार्ज कार्ड प्रयोग गर्ने गरेका छन् । 

कुन आवमा कति रिचार्ज कार्ड आयात ? 
विशेषगरि कोरोना काल पछि नेपालमा रिचार्ज कार्डको आयात घटेको देखिन्छ । कोरोना नियन्त्रण गर्न लकडाउन गरेपछि राष्ट्र बैंक तथा बैंकहरुले डिजिटल भुक्तानीलाई प्रोत्साहन गरेका थिए । त्यसपछि आम मानिसहरु पनि कोरोना संक्रमण हुने डरमा नगदको सट्टा डिजिटल भुक्तानी गर्न सुरु गरे । साथै, रिचार्ज कार्डको सट्टा पनि डिजिटल रिचार्ज नै गर्न थाले । त्यसपछि  अनलाइन रिचार्ज गर्ने प्रवृत्ति बढ्दै गएको छ । 

भन्सार विभागको तथ्यांकअनुसार कोरोना काल सुरु हुनुभन्दा अघिल्लो आव २०७५–७६ मा नौ करोड १३ लाख ७१ हजार रुपियाँ र आव २०७६–६६ मा १० करोड ११ लाख ४१ हजार रुपियाँको रिचार्ज कार्ड आयात भएको छ । आव २०७६–७७ को फागुनसम्म कोरोनाको असर देखिएको थिएन । २०७६ चैत ११ गतेदेखि नेपालमा लकडाउन गरिएको थियो । 

त्यसपछि आव २०७७–७८ मा ३ करोड ३४ लाख ५१ हजार रुपियाँ, आव २०७८–७९ मा ३ करोड ४५ लाख ७५ हजार रुपियाँ र आव २०७९÷८० मा ६ करोड ६९ लाख ६४ हजार रुपियाँको रिचार्ज कार्ड आयात भएको थियो । अघिल्ला आवहरुको तुलनामा गत आवमा यसको आयात बढेको थियो । तर, चालु आवमा त्यो स्वाट्टै घटेको भन्सार बिभागको तथ्यांकले पुष्टी गरेको छ ।