लगानी विस्तार गर्न दुई अर्बको पब्लिक कम्पनी खडा गर्दै नेपाल लाइफ (सीईओसँगको कुराकानी)

काठमाडौं । नेपाल लाइफ इन्स्योरेन्स कम्पनीका प्रमुख कार्यकारी अधिकृत (सीईओ) प्रवीणरमण पराजुलीले कम्पनीको लगानी विविधिकरणका लागि दुई अर्ब रुपियाँ पुँजीको पब्लिक कम्पनी स्थापना गर्न लागेको जानकारी दिएका छन् । 

कर्पोरेट नेपालसँगको कुराकानीमा उनले नेपाल लाइफले लगानीका लागि स्थापना गर्न खोजेको सहायक कम्पनीका लागि नेपाल बीमा प्राधिकरणसँग अनुमति लिने प्रक्रिया अघि बढाएको जानकारी पनि दिए । नयाँ बीमा ऐनले पनि लगानीको कुरालाई टेकेको बताउँदै सीईओ पराजुलीले सोअनुसार नेपाल लाइफले लगानीको विविधिकरणका लागि खोज गर्न थालिसकेको बताए । 

साथै, सीईओ पराजुलीले नेपाल लाइफको कर्पोरेट अफिस र प्रदेश कार्यालयहरुको लागि घरजग्गाको व्यवस्था गर्न टेण्डर आव्हान गरेका छौं । त्यसले पनि गति लिइरहेको उनले बताए । पराजुलीले दीर्घकालिनरुपमा सम्पत्ति जोड्ने कुरा नै हो भने । अहिलेको आर्थिक मन्दीले समग्र बीमा बजार खुम्चिएको स्वीकार गर्दै उनले तर नेपाल लाइफको कार्यक्षमता गत बर्षको भन्दा राम्रो रहेको र बजार हिस्सा बढेको उदाहरण दिए । 

सुनौलो भविश्य जीवन बीमा योजनाअन्तर्गत ‘सिंगल प्रिमियम अप्सन’ किन स्थगित गरियो ? 
नेपाल लाइफले आफ्नो निकै लोकप्रिय प्रोडक्ट (उत्पादन) सुनौलो भविश्य जीवन बीमा योजनाअन्तर्गतको ‘सिंगल प्रिमियम अप्सन’ अहिले स्थगित गरेको छ । यो अप्सन स्थगित भएसँगै सार्वजनिकरुपमा चासो र अन्योलता बढेको बेला सीईओ पराजुलीले पोर्टफोलियो मिक्समा सिंगल प्रिमियमको हिस्सा कुल प्रथम प्रिमियमको अधिकतम् १५ प्रतिशतको हाराहारीमा हुनुपर्छ भन्ने सिद्धान्त रहेको र नियमकले पनि सोही कुरालाई विचार गर्न भनेकाले आफूहरुले अस्थायीरुपमा यो प्लान स्थगित गर्नुपरेको बताए । 

उनका अनुसार सुनौलो भविश्य जीवन बीमा योजना तीन वटा अप्सनमा आएको छ । यो प्रोडक्ट प्रतिस्पर्धी र दीर्घकालिन सोचका साथ ल्याएको हो भन्दै पराजुलीले कम्पनीको सोचअनुसार नै कम्पनीका अभिकर्ताहरुले यो प्रोडक्ट बिक्री गर्न सफल पनि भएको बताए । 

उनले भने, ‘हामीले कसरी हेर्छौं भने प्रोडक्टको पोर्टफोलियो साइजहरु हुन्छ । कतिसम्म साइजमा बिक्री गर्न मिल्ने ? भन्ने कुरा हुन्छ । सुनौलो भविश्यलाई हेर्यौं भने यसले राम्रो व्यापार गर्यो । यो प्रोडक्ट पनि तीन वटा लाइन (अप्सन)मा आएको छ ।’ यी तीन वटा अप्सनमध्ये तेस्र्रो अर्थात सिंगल प्रिमियम अप्सन अल्पकालिनरुपमा स्थगित गरेको सीईओ पराजुलीले बताए । तीन वटै अप्सनको बिक्री र प्रभावकारीको राम्रो हुँदाहुँदै पनि पोर्टफोलियो मिलाउन तेस्रो (सिंगल प्रिमियम अप्सन) प्लानलाई स्थगित गर्नुपरेको उनको भनाई छ । पहिलो दुई वटा प्लानलाई भने अहिलेसम्म स्थगित नगरेको र गर्नु आवश्यक पनि नरहेको पराजुलीले बताए । 

उनले भने, ‘विगत तीन महिनाको कुल फष्ट प्रिमियममा सिंगल प्रिमियमको हिस्सा १५ प्रतिशत नाघेको अनुभूति भयो । हाम्रो पोर्टफोलियोमा त धेरै वटा प्रोडक्ट छ । म्यानेजमेन्टले हेर्ने भनेको नै कुन प्रोडक्टलाई कुन र कति हिस्सासम्म बिक्री गर्ने ? भन्ने हो । कुन समयमा कुन पोर्टफोलियो मिक्स बनाउने ? भन्ने हो ताकी त्यसको लाभ सबै अभिकर्ता, बीमित र शेयरहोल्डरहरुलाई होस् । साथै, संस्थाको वित्तीय अनुशासन पनि कायम रहोस् भन्ने हो ।’