काठमाडौंः ओखलढुँगाका उज्जनकुमार श्रेष्ठको हत्या गरेको ठहर गर्दै सर्वोच्च अदालतले जन्मकैदको सजाय सुनाएपछि गत बर्ष जेल परेका बालकृष्ण ढुँगेल मंगलबार जेलमुक्त हुँदा उनको भव्य स्वागत भएको छ ।
गणतन्त्र दिवसको अवसर पारेर राष्ट्रपति विद्या भण्डारीले उनको बाँकी कैद मिनाहा गरेपछि डिल्लीबजार सदरखोर प्रशासनले उनलाई बिहान जेलमुक्त गरिदिएको हो । विवाद र विरोधका बीच राष्ट्रपति भण्डारीले ढुँगेललाई कैद मिनाहा गरिदिएकी हुन ।
सरकारले सिफारिस गरे पनि स्वीकृत गर्ने नगर्ने अधिकार राष्ट्रपतिमा निहीत हुन्छ । तत्कालिन माओवादीका नेता एवं पूर्वसाँसद ढुँगेल उज्जन हत्याकाण्डमा दोषी ठहर भएपछि पनि लामो समयसम्म फरार रहँदै आएका थिए ।
जेलबाट निस्किँदा ढुँगेलको चेहेरामा आक्रोस र अहंता देखिन्थ्यो । उनको स्वागतमा पुगेका झण्डै सय जनाले ढुँगेललाई सयपत्रीको माला र खादा लगाएर भव्य स्वागत गर्नुका साथै उनको समर्थनमा नाराबाजी गरेका थिए ।
ढुंगेलसँगै अन्य ८१६ कैदीले समेत आजै माफी पाएका छन् । प्रक्रिया पूरा गरेका कैदीलाई गणतन्त्र दिवसका अवसरमा छाड्ने प्रचलन रहे पनि जन्मकैदको सजाय पाएर गत बर्ष मात्रै जेल चलान गरिएका ढुँगेललाई कैद माफी दिने समय नै भएको छैन ।
ढुँगेललाई उनका समर्थकहरूले नेपाल कम्युनिस्ट पार्टीको कार्यालय (पूर्व माओवादी मुख्यालय) पेरिसडाँडामा लगेर विशेष सम्मान पनि गरेका छन् ।
रिहा भएपछि ढुँगेलले आफ्नो रिहाइ रोक्ने प्रयासलाई परास्त गर्ने आँट गरेको भन्दै सरकारलाई धन्यवाद दिए। उनले आफूलाई मैदानमा आउन नदिन डलरवादीहरू लागिरहेको भन्दै उनीहरु शान्तिमा युद्धको खेती गर्ने र जहिले पनि भिख मागेर खाने डलरवादीहरू भएको बताए ।
आफूले गणतन्त्र ल्याउन ठूलो योगदान गरेको उनको दावी छ । ढुँगेलले रिहा हुँदै गर्दा आफू त्यति खुसी पनि नभएको र त्यति निराश पनि नरहेको भन्दै तर आफूविरुद्ध दायर रिट धेरै पहिला नै खारेज हुनुपर्नेमा अहिलेसम्म पनि त्यसलाई बहसको विषय बनाइएकोमा आपत्ति जनाए ।
ढुँगेलले कानुन व्यवसायी दिनेश त्रिपाठी (जसले ढुँगेलविरुद्ध मुद्दा दायर गरेका थिए) संकटकालमा कस्तो जुत्ता चाटेर बसेका थिए ? भन्दै प्रश्न पनि गरे । उनले कतिपय पत्रकार, न्यायाधीश र कानुन व्यवसायी एक थाल भातमा बिक्ने गरेको भन्दै आक्रोसमेत पोखे ।
