अस्ट्रेलिया । पछिल्लो समय आप्रवासीहरुप्रति कडा नीति लिएको अस्ट्रेलियाले यसवर्ष स्थायी अनुमतिको संख्या करिब १० प्रतिशतले घटाएको छ । सरकारको पछिल्लो तथ्यांकअनुसार गत वर्षको तुलनामा यहाँ प्रवेश पाउने आप्रवासीको संख्या करिब २१ हजार कम छ ।
यसवर्ष करिब एक लाख ६३ हजारलाई मात्र प्रवेशको अनुमति पाएका छन् । गतवर्ष करिब एक लाख ८४ हजारले आप्रवासीका रुपमा प्रवेशको अनुमति पाएका थिए । अध्यागमन विभागको तथ्यांकअनुसार सबैभन्दा धेरै स्किल माइग्रेसन कार्यक्रमअन्तर्गत प्रवेश पाउनेहरुको संख्या करिब १२ हजारले कम गरिएको छ भने पारिवारिक शीर्षकअन्तर्गत आउनेहरुको संख्या करिब नौ हजारले कम भएको छ ।
अस्ट्रेलियाले हरेक वर्ष निश्चित संख्यामा आप्रवासीहरुलाई अस्ट्रेलिया प्रवेशको अनुमति दिने गरेको छ ।
अस्ट्रेलियाका अध्यागमन मन्त्री पिटर डट्टनले आप्रवासीहरुको संख्या कम हुनुमा अध्यागमन विभागको चुस्त कार्य र आवेदकको झुठो आवेदनका कारण रहेको बताए । उनले देशको भलाईका लागि आप्रवासीहरुको संख्या कम गर्नुपर्ने बताउँदै आएका छन् । अस्ट्रेलिया प्रवेश पाएपछि उपलब्ध सेवा लिनेभन्दा पनि सरकारलाई केही योगदान दिनेहरुको आवश्यक्ता रहेको उनको भनाइ थियो ।
अस्ट्रेलियामा सबैभन्दा धेरै आप्रवासीको संख्या भारतबाट रहेको छ भने त्यसपछि चीन र बेलायतका छन् ।
आजको कान्तिपुर दैनिकबाट ।
