काठमाडौं । नेपाल महिला संघले बलात्कारपछि हत्या गरिएकी कञ्चनपुरकी बालिका निर्मला पन्तका हत्यारालाई पत्ता लगाउन नसकेको भन्दै गृहमन्त्री रामबहादुर थापाको राजिनामा माग गरेको छ ।
आइतबार पत्रकार सम्मेलन गरेर संघले निर्मलाको हत्यारा पत्ता लगाउन वर्तमान सरकार असफल भएको भन्दै थापाको राजिनामा माग गरेको हो । संघकी महासचिव धना खतिवडाले नक्कली अभियुक्त खडा गरेर निर्मला पन्तका बास्तविक हत्यारालाई सरकारले उन्मुक्ति दिन खाजेको आरोप लगाइन् ।
उनले भनिन्, ‘गत साउन १० गते बलात्कारपछि हत्या गरिएकी बालिका निर्मला पन्तका हत्यारालाई सरकारले उन्मुक्ति दिन खोज्दैछ, पटक–पटक नक्कली अभियुक्त खडा गरेर सरकार असली हत्यारालाई जोगाउन लागेको छ, यस्तो घृणित र खेदजनक कार्यप्रति नेपाल महिला संघ घोर भत्र्सना गर्दछ ।’
निर्मला पन्तको हत्या सामान्य खानदानको मानिसले नगरेको पनि खतिवडाको दाबी छ । उनले भनिन्, ‘निर्मलाको हत्या सामान्य खानदानको मान्छेले गरेको होईन भन्ने कुरा आमनागरिकले महशुश गरिसकेका छन् । अहिले खडा गरिएका अभियुक्तका बयान र निर्मला पन्तको पोष्टमार्टम रिपोर्टले फरक सत्य बताएको छ । यस्तो नाटक गरेर जनता र गरिबहरुमाथि दुई तिहाई नेकपाको सरकारले खेलबाड गरिहेको छ । के यसरी समृद्ध र सुखि नेपाली बन्छन् ? म सोध्न चाहन्छु यस्तो विषम परिस्थितिमा पनि गृहमन्त्रीले नैतिकताको आधारमा राजीनामा दिनुपर्छ कि पर्दैन् ?
नेपाल सनतान धर्मको ऐतिहासिक पृष्ठभूमिको देश भएको भन्दै खतिवडाले भनिन्, ‘व्यक्ति जुनसुकै कार्यक्रम र सभामा सहभागि हुन पाउँछ तर सरकार नै विवादित धार्मिक संस्थाको आयोजक बन्नु कहाँसम्मको जायज हो ? यो आम नेपाली जनताको भावना र संविधान हित विपरित कार्य हो, सरकारको यस रबैयाप्रति महिला संघले आपत्ति जनाउँछ । महिलाकाबारेमा हामीले नगरे कसले गर्ने ? अहिले नगरे कहिले गर्ने ?’
महिला हिँसाविरुद्ध १६ दिने राष्ट्रिय अभियान जारी रहेको बताउँदै खतिवडाले थपिन्, ‘असल मानिस केही नगरि बस्नु भनेको खराब मानिसको नियत सफल हुनु हो’ राज्यले महिलाहरुको बारेमा अधिकार दिएको छ, तर व्यवहारमा महिलाहरुले अधिकार पाएका छैनन् । कानून फितलो छ । बलत्कार, दण्डहिनता चरम पराकाष्ठा छ । अर्कोतर्फ मूल्य बृद्धि, कालोबजारी, भ्रष्टाचार मौलाएको छ । तीन तहको स्थानीय सरकार भएर पनि जनताले विधिको शासन र कानूनी राजको महसुस गर्न पाएनन्, देशको विकास र समृद्धि भाषणमा सीमित छ ।’
