रौतहट । जीवन बीमा कम्पनीबाट २५ लाख पाउने लोभले ४ वर्षीया छोरीको हत्या गर्ने बाबु पक्राउ परेका छन् । रौतहटको मौलापुर नगरपालिका–६, पथरा बुधरामका रामकिशोर राय यादवले ४ वर्षीया छोरी लक्ष्मीकुमारी यादवको हत्या गरेको खुलासा भएको हो ।
घरमा सुतिरहेकै अवस्थामा असार १७ गते हराएकी लक्ष्मीको शव भोलिपल्ट बिहान गाँउकै एक पोखरीमा भेटिएको थियो । नाबालिका लक्ष्मीको शव फेला परेपछि प्रहरीले अनुसन्धान गर्दै जाँदा रामकिशोरले बिमाको ठूलो रकम हातपार्न आफ्नै कान्छी छोरीको निर्ममतापूर्वक हत्या गरेको रहस्य खुलेपछि हत्या गर्ने बाबुलाई प्रहरीले नियन्त्रणमा लिएको थियो ।
हत्या गर्ने र बीमाको रकम निकाल्ने योजना अनुरुप राम किशोरले गरुडाको प्रभु लाइफ इन्सुरेन्स कम्पनीमा जेठ १९ गते छोरीको २५ लाखको जीवन बीमा गराएको अनुसन्धानबाट खुलेको प्रहरीले जनाएको छ । राम किशोरले राति आमासँगै सुतिरहेकी छोरीलाई बोकेर लगेको र नाक मुख थुनेर हत्या गरी पोखरीमा फालेको स्वीकारेका छन् ।
प्रहरी हिरासतमा रहेका यादव तत्कालीन माओवादीले गरेको सशस्त्र द्वन्दमा समेत सामिल भएका थिए। द्वन्दकै क्रममा उनी विभिन्न मुद्दामा २०५८ सालदेखि ६१ सालसम्म जेलसमेत बसेको प्रहरीले पत्रकार सम्मेलनमा जानकारी दिएका छन्।