शहीद स्मारकः बाह्य पर्यटकको पनि आकर्षण बन्दै

मकवानपुर । हेटौंडा उपमहानगरपालिका वडा नम्बर ११ नवलपुरस्थित शहीद स्मारक परिसरमा आदिवासी जनजातिको संग्रहालय स्थापना गरिने भएको छ । अहिले  संग्रहालय भवनको निर्माण अन्तिम चरणमा पुगेको छ । 

मकवानपुरका आठ गाउँपालिका, एक नगरपालिका र  एक उपमहानगरपालिका क्षेत्रमा बसोबास गरेका आदिवासी जनजातिको भेशभूषा, रीतिरिवाज, धर्मसंस्कृतिका झलक तथा उनीहरुले प्रयोगमा ल्याएका भाँडावर्तन र औजार संग्रहालयमा राखिने शहीद स्मारक विकास समितिका उपाध्यक्ष रामेश्वर रानाले जानकारी दिए । 

स्मारक अहिले झोलुंगेपुल, थाहा स्तम्भ, बुद्ध प्रतिमा, मनमोहन उद्यान, पौडी पोखरी, वनभोजस्थललगायत एक सिंँगे गैँडाको प्रतिमा स्थापना गरी बाह्य र आन्तरिक पर्यटकको आकर्षणको केन्द्र बनेको  समितिका कार्यालय प्रमुख रामचन्द्र न्यौपानेले बताए । स्मारकमा भारतका विभिन्न शहर तथा भुटान, श्रीलंका, पाकिस्तान, माल्दिभ्सलगायत देशका पर्यटक पनि  अवलोकनका लागि आउने गरेका छन् ।

बन्दाबन्दी र निषेधाज्ञाका कारण स्मारकमा बाह्य एवम् आन्तरिक पर्यटक आउन नपाउँदा अहिले  समितिलाई आर्थिक संकट उत्पन्न भएको छ । त्यहाँ कार्यरत प्रशासनिक एवम् अन्य मजदूर, कर्मचारीलाई बडादशैँका अवसरमा पनि तलबभत्ता बाँड्न कठिनाइ उत्पन्न भएकाले अन्य स्रोतबाट रु ३० लाख ऋण लिई  वितरण गरिएको  न्यौपानेले जानकारी दिए । ्

समितिका अनुसार अघिल्लो आर्थिक वर्ष २०७५/०७६ मा बाह्य र आन्तरिक पर्यटक गरी चार लाख १० हजार पर्यटकले स्मारकको अवलोकन गरेको र त्यसबाट रु एक करोड २५ लाख आम्दानी गरिएको  छ ।  समितिलाई अझ प्रभावकारी रुपमा सञ्चालनमा ल्याउन परिसरभित्र आन्तरिक पर्यटन सूचना केन्द्र, तालीम कक्ष, अतिथि भवन आदि निर्माण गर्ने सोच पनि छ । 

सहिद स्मारक परिसरबाट उत्तरतर्फ रहेको पुण्य क्षेत्रको शक्तिपीठमा जान करीब दुई किलोमिटर सडक निर्माणका लागि प्रदेश सरकार, भौतिक पूर्वाधार  मन्त्रालय र  उपमहानगरपालिकालाई समितिका तर्फबाट पत्राचार गरिको छ । स्मारक भित्र हरियाली वातावरणलाई अझ संरक्षण गरी जिल्लाका अन्य क्षेत्रमा रहेका  पर्यटन स्थानको व्यवस्थापन गरी बाह्य पर्यटक भित्र्याउन  थानाभया¥याङदेखि भैरव डाँडाको मनमोहन भ्यु टावर र  स्मारक जोड्ने थप सडक निर्माणका लागि वाग्मती प्रदेश सरकारलाई आग्रह गरिएको छ  ।

तत्कालीन मकवानपुर जिल्ला विकास समिति र हेटौंँडा नगरपालिकाको पहलमा वडा नम्बर ११ नवलपुरमा विसं २०५० वैशाख १५ गते स्मारक स्थापना गरिएको थियो । तत्कालिन जिविस सभापति वीरबहादुर लामाले उक्त स्मारकको शिलान्यास गर्नुभएको थियो । तत्कालिन नेकपा एमालेका अध्यक्ष एवम् प्रधानमन्त्री मनमोहन अधिकारीले विसं २०५१  माघ १७ गते स्मारक उद्घाटन गरेका थिए । 

राष्ट्रपति विद्यादेवी भण्डारीले करीब डेढ वर्षअघि  समितिको परिसरमा स्थापित कोइराला, सिंह, पुष्पलाल र   अधिकारीको शालिक अनावरण गरेकी थिइन् ।  हेटौंडा बजारबाट करीब चार  किलोमिटर उत्तरतर्फ  करीब २० हेक्टर क्षेत्रफल स्मारक क्षेत्रले ओगटेको बताइएको छ । स्मारकमा तत्कालीन स्थानीय विकास र शहरी विकास मन्त्रालय, तत्कालीन जिविस, हेटौँडा नगरपालिका, विभिन्न गैरसरकारी संघसंस्था तथा बाह्य दातृ संस्थाको प्रत्यक्ष सहयोगसमेत गरी करीब रु  २४ करोड अनुदान खर्च भइसकेको समितिले जनाएको छ । उक्त स्मारक विकास समितिमा हाल करीब ३० मजदूर र कर्मचारी कार्यरत  छन् । रासस