शनिबार १५ बैशाख, २०८१ | Saturday Apr 27, 2024
काठमाडौं । नाडा अटोमोवाइल्स एशोसियशन अफ नेपालले निषेधाज्ञाका कारण जनता दुःख, पीडा र अभावमा परी बाध्य भएर सडकमा निस्किने अवस्था आएको भन्दै यसलाई अब अन्त्य गरी जनतालाई निस्किन र उद्योग व्यवसाय चल्न दिन सरकारसँग आग्रह गरेको छ ।
नाडाले सरकारले यथासक्य चाँडो जनतालाई कोभिडविरुद्धको खोपको व्यवस्था गरी संक्रमणबाट बच्ने अन्य सुरक्षात्मक उपायहरूको कडाइका साथ पालन गराउँदै उद्योग व्यवसाय सञ्चालन गर्ने वातावरण बनाउनुपर्ने बताएको छ ।
थपिँदो निषेधाज्ञा अवधीका कारण अब जनता स्वयं नै आफनो दुःख, पीडा र अभावमा परी बाध्य भएर सडकमा आउने संभावना प्रवल हुँदै गएको र यस्तो संभावित समस्यालाई सरकारले यथोचित सम्बोधन पनि गर्न नसकिरहेको वर्तमान अवस्थामा निषेधाज्ञाको अवधि थपिँदै जादा समस्या अरु भयावह हुने नाडाको भनाई छ ।
यस्तो विकट स्थिति आउनुअघि नै सरकारले घटदो क्रममा रहेको कोरोना संक्रमणको स्थितिलाई दृष्टिगत गर्दै निषेधाज्ञालाई क्रमसः खुकुलो बनाउँदै लैजान नाडाले आग्रह गरेको छ ।
