फरक ‘वर्किङ कल्चर’ जसले बनायो शिखर इन्स्योरेन्सलाई ‘नम्बर वान’

शिखर इन्स्योरेन्स कम्पनीका प्रमुख कार्यकारी अधिकृत (सीईओ) दीपप्रकाश पाण्डेसँग बीमा क्षेत्रमा काम गरेको तीन दशकभन्दा लामो अनुभव छ । निर्जीवन बीमा क्षेत्रमा शिखर इन्स्योरेन्सलाई अब्बल बनाउन पनि उनको अहम भूमिका छ । बीमा बजारमा नौला किसिमका बीमा उत्पादन ल्याएर बीमितहरुको आवश्यकता पूरा गन आफ्नो व्यवस्थापनमा रहेको बीमा कम्पनी सफल भएकोमा पाण्डे गर्व गर्छन् । बीमक संघ नेपालको समेत नेतृत्व गरिसकेका उनले शिखर इन्स्योरन्सलाई अब कसरी अघि बढाउँदैछन् ? कर्पोरेट नेपालकर्मी नविन पोखरेलले गरेको कुराकानीः 

तपाइँको बीमा क्षेत्रको यात्रा कसरी आरम्भ भएको थियो ?
निकै चाख लाग्दो प्रश्न उठाउनु भयो । मैले बीमा क्षेत्रमा प्रवेश गरेको तीन दशक भइसक्यो । बीमामा लाग्नुअघि मेरो घरमा विवाहको कुरा चलेको थियो । बिहेको कुरा चल्दा मेरो कुनै जागिर थिएन् । नेपाली चलनअनुसार जागिर नभई विवाह नगर्नु भन्ने भनाईहरु पनि छ । त्यस्तै संयोग मलाई पनि मिले जस्तै लाग्छ । ससुराली जाँदा जागिर सोधे भने के भन्ने ? ममा प्रश्न उठ्ने गर्थ्यो । त्यही क्रममा मेरो जागिर पनि भयो । मैले तत्कालिन एभरेष्ट इन्स्योरेन्समा ‘फाइनान्स म्यानेजर’ (अर्थ व्यवस्थापक) पदबाट बीमा क्षेत्रको यात्रा सुरु गरेको हो । त्यतिबेला मैले चार्टर्ड एकान्टेन्सी (सीए) अध्ययन गरिरहेको थिए । एभेरेष्ट इन्स्योरेन्समा काम गर्दा नयाँ नयाँ बीमा कम्पनीहरु आएकाले कर्मचारीहरु यताउता जाने र लाने होडबाजी थियो । एभरेष्ट इन्स्योरेन्सका शैलेन्द्र श्रेष्ठ त्यति बेला डीजीएम (उपमहाप्रवन्धक) हुनुहुन्थ्यो । त्यति बेलामा दूरदर्शी चेयरम्यान (अध्यक्ष) मोहनगोपाल खेतान हुनुहुन्थ्यो । डीजीएम शैलेन्द्र सरले कम्पनी छोडेपछि नयाँ मान्छे ल्याउनुभन्दा यहीं काम गरिरहेको दीपलाई अवसर दिनुपर्छ भन्नुभयो चेयरम्यान सरले  । मैले बीमा क्षेत्रको अनुभव पनि विस्तार बढाउँदै जाने मौका पाएँ । बीमा क्षेत्रमा काम गरेको तेस्रो वर्षमा नै एक्टिङ (कार्यबहाक) सीईओ जसरी काम गर्न थालेको थिए । एभरेष्ट इन्स्योरेन्समा मैले आठ वर्ष काम गरेर छोडेको हो । छोडदा एभरेष्ट इन्स्योरेन्स बीमा क्षेत्रको एक नम्बरकै कम्पनीको रुपमा स्थापित भईसकेको थियो । मलाई कम्पनीको स्वामित्व लिने र कम्पनीको नेतृत्व गर्ने कुरा फरक हो जस्तो लाग्यो । त्यसले गर्दा नै म कामै गर्ने हिसाबले शिखर इन्स्योरेन्समा आवद्ध भएको थिएँ । अहिलेसम्म काम गरिरहेको छु । 
 
बीमा क्षेत्रको यात्रा आरम्भ गर्दा र अहिले यही क्षेत्रमा लामो अनुभव हाँसिल गरिसकेपछि फर्केर हेर्दा तपाइँले के कस्ता अन्तर पाउनु हुन्छ ?
त्यो बेला सुरुवाती चरणमा बीमा गर्ने भनेको एउटा औपचारिकता पूरा गर्नको लागि मात्रै थियो । बीमाको आवश्यकता बुझेर निकै कमै मात्रामा बीमा हुन्थ्यो । त्यति बेला प्राविधिक टिम हावी थियो किनभने अरुले बीमा बुझ्ने मौका पाएका थिएनन् । अब अहिलेको बजारको कुरा गर्दा मार्केटिङ (बजारीकरण) टिम हावी छ । यसको मतलब मैले मार्केटिङको आवश्यकता छैन् भन्न खोजेको होइन् तर अहिले मार्केटिङकै कारण पनि बीमा शहर केन्द्रीत त छैन् नि । मैले बीमामा सुरु गर्दा बीमा कम्पनीहरुले जम्मा १० वटा शाखा खोले भने त्यो निकै ठूलो कुरा हुन्थ्यो । पहिले बीमा बुझेका अन्डरराइटिङ टिमले बीमा बजार कब्जा गरेका थिए भने अहिले मार्केटिङले मात्रै बीमा चल्ने अवस्था आएको छ । अहिले बीमा कम्पनीहरुले दशबाट बढाएर सय भन्दा धेरै शाखा बिस्तार गरेका छन् । विगतमा बीमा कम्पनीहरुको निकै सानो क्यापिटल (पुँजी) थियो । जोखिम बहन गर्ने क्षमता पनि कम थियो भने खर्च गर्न सक्ने अवस्था पनि कम थियो । त्यस्ता कुराले बजार बिस्तार गर्ने क्षमता पनि बढाउन सकेको थिएन् । अब अहिले तपाइँहरुले हेर्नु भयो भने ती चिजहरुमा त धेरै सुधार भइसकेको छ । अहिले क्यापिटल बढ्यो । कम्पनीको क्षमता बढ्यो । साँच्चै भन्दा पहिलेको भन्दा बीमा बजारमा फरकपन छाएको अवस्था छ । 

विदेशिने युवाहरुलाई बीमा क्षेत्रले रोक्न किन सकेन ? के लाग्छ तपाइँलाई ?
हाम्रोमा केही फरक भएर पनि होला । तपाइँले बाहिरका देशहरुमा हेर्ने हो भने त बैंक र बीमामा काम गर्ने मान्छेहरु समान हुन्छन् । युवा पलायन हुने अहिलेको समस्या छ । पहिले बैंकहरुले पनि ठूला र धनी मान्छेहरु तानेरै व्यवसाय गरेकै अवस्था त थियो । यी कुराहरु भनेको बजारमा पहुँच बिस्तार भएसँगै मिल्दै जाने कुरा हुन कि जस्तो पनि देखिन्छ । अब त बीमा पनि बैंकको लेवल (तह)मा पुग्न लागिसकेको अवस्था छ । बैंक भन्दा बीमा त धेरै प्राविधिक विषय हो है । बीमाले सीए, सर्भेयर, अभिकर्ता, स्वास्थ्यकर्मी लगायत कैयौं क्षेत्र पनि छोएको हुन्छ । यसमा एउटै कुरा भनेको नागरिकले पाउने सेवा सुविधा भने गुणस्तरीय ढंगबाट दिनुपर्छ । बीमा क्षेत्रले पनि राम्रै अवसर दिएको अवस्था छ भने यहाँ कमाई राम्रै हुने अवस्था सिर्जना भइसकेको छ । 

कुनै पनि बीमा कम्पनी साच्चै बलियो छ भन्ने आधार चाहिँ के हुनसक्छ ? 
सिम्पल कुरा, दाबी तिर्नुपर्ने रहेछ । सानो क्यापिटल भएका कम्पनीले धेरै प्रोफिट (नाफा) देखाउन थाल्यो भने त केही सम्झौता गर्नुपर्ने हुनसक्ला । तर, बीमा कम्पनीहरुले त्यस्तो गर्नु हुँदैन । दाबी समयमा तिर्नुपर्छ । बीमितले पाउने सुविधामा ढिलाई गर्नु भएन् । एक पटक बीमितको विश्वास जित्यो भने त यहाँहरुले आफै बीमाको मार्केटिङ गर्नु हुन्छ नि । गाईको बीमालाई नै हेरौं त । पल्ला घरे साईलाको गाई मरेको थियो । फेरि नयाँ किनेर ल्याएछ । उसले कहाँबाट पैसा ल्याएछ ? भन्दा बीमाले पो दिएको रहेछ त । यसरी हुन्छ बीमाको सक्कली मार्केटिङ । अहिलेसम्म शिखर इन्स्योरेन्सले पनि गरिहरेको पनि त्यही हो । 

अहिले बीमा कम्पनीहरुले दाबी भुक्तानी दिएको कुरालाई बढी प्रचार गर्न थालेको देखिन्छ नि । तपाइँलाई यो कस्तो लाग्छ ?
बीमा कम्पनीहरुले दाबी भुक्तानी तिरे भनेर प्रचार गर्ने विषय होइन । यो त आफै देखिने कुरा हो । वि.स. २०७२ को विनाशकारी भूकम्पमा बीमा कम्पनीहरुले सक्दो दावी तिरेका थिए । त्यति बेला कुनै प्रचार गर्नु जरुरी परेको थिएन । बीमाले पैसा दिन्छ भन्ने आफै प्रचार भएको थियो । बीमाले वैधानिक रुपमा कागजपत्र ठिक भएको ठाउँमा पैसा दिन्छ । ठिक छैन भने पैसा रोक्छ । दिने ठाउँमा चाहिँ ढिलो नगरौं, सक्दो छिटो दिनुपर्छ भन्ने कुरा हुनसक्छ । पहिले तेस्रो पक्षमा नआउनु, एउटा गाडीले मान्छे हान्दा राजमार्ग बन्द हुन्थ्यो । पूर्व अर्थमन्त्री सुरेन्द्र पाण्डेले बजेट भाषणबाट तेस्रो पक्ष बीमालाई अनिवार्य गरेसँगै त्यसको लाभ त अहिले जनताले नै पाइरहेको अवस्था छ । भूकम्पको समयमा शेयर बजार लामो समय खस्किएको थियो भने बीमाले त आफ्नो पैसा तिरेकै हो । त्यही कारणले पनि होला चौथो नम्बरमा रहेको शिखर इन्स्योरेन्स भूकम्पपछि पहिलो नम्बरमा आउन सफल भयो । एक अर्ब १७ करोड रुपियाँ त शिखर इन्स्योरेन्स कम्पनीले एक्लैले भुक्तानी गरेको थियो । बजारबाट बीमा कम्पनीले उठाउने बीमाशुल्क बढ्दो क्रममा नै छ । यस्तो हुनुको कारण भनेको बीमा कम्पनीहरुले गरिबहरुको दाबी समयमा नै तिरेकाले हो । 

दाबी समयमा तिर्दा बीमाशुल्क बढ्छ भन्नुभयो । बीमितको दावी रोक्दा चाहिँ कम्पनीलाई ‘व्याकफायर’ गर्छ कि गर्दैन ? 
त्यो त अवश्य गर्छ । अनि यस्तो हुन्छ भन्ने कुरा बीमा कम्पनीको तर्फबाट हेर्ने हो भने चाहिँ उनीहरुले समयमा नै दाबी दिने कुरामा धेरै चनाखो हुनुपर्छ । असजिलो बनाउनु भयो, ढिलो दाबी तिर्नु भयो दाबी दिनै कुनै कन्जुस्याईं गरियो भने त सिधै ‘ब्याकफायर’ (प्रतिउत्पादक) हुन्छ । 

शिखर इन्स्योरेन्समा पनि त ‘पेण्डिङ क्लेम’ होलान् । कुनै पनि बीमा कम्पनीमा त्यस्तो अवस्था किन आउँछ ? 
शिखर इन्स्योरेन्सकै सोधिहाल्नु भयो । हाम्रोमा त दाबी तिर्न मात्रै अनुभवी ५० जना कर्मचारी छन् । यस्तै उहाँहरुलाई सघाउने कर्मचारीहरु त अरु थुप्रै छन् । यति बुझ्नुस कि प्रत्येक वर्ष सर्भेयरहरुलाई राखेर तपाइँहरुको समस्या के छ ? भनेर सोध्ने नेपाली बीमा बजारमा एक मात्र कम्पनी शिखर इन्स्योरेन्स मात्रै हो । हामीले सर्भेयरलाई पनि छात्रवृत्ति दिएका छौं । सर्भेयरले शिखर इन्स्योरेन्समा आउँदा यो कम्पनीलाई आफ्नै कम्पनी ठान्छन् । यदी कसैले काम गर्न चाहान्छन् भने उनीहरुलाई वातावरण दिने काम हामीले गर्छौं । काम गर्नेले पनि आफ्नै कम्पनी ठान्ने वातावरण बन्छ ।

सर्भेयरलाई छलफलको अवसर दिँदा उहाँहरुलाई शिखरप्रतिको अपनत्व झल्किने वातावरण बनेको हो र ?
फेरि त्यस्तो पनि होइन । बीमा क्षेत्रप्रति उहाँहरुको कामको लगावले गर्दा बीमाप्रतिको अपनत्व बढ्ने भन्ने मैले भन्न खोजेको हो । यसरी कामप्रतिको लगाव बढ्दा शिखर इन्स्योरेन्सलाई मात्र नभई समग्र बीमा क्षेत्रलाई नै लाभ पुग्छ । मैल सर्भेयर शिखरको भन्न खोजेको होइन् । उहाँहरु स्वतन्त्र हुनुहुन्छ । तै पनि उहाँहरुले शिखरमा काम गर्दा दाबी भुक्तानीलाई तीब्रता दिएकै अवस्था छ । यो हाम्रो ‘वर्किङ कल्चर’ले गर्दा पनि होला । 

अहिले बीमा कम्पनीहरु मर्जरमा गइसकेको अवस्थामा शिखर इन्स्योरेन्स पूरानै गतिमा हिड्छ वा ‘गियर’ बढाउनुपर्ने दबाब सिर्जना भएको छ ? 
हामी एउटा लामो दौडमा छौं । लामो दौडमा केही थाक्न पनि सक्छन । थाक्नु स्वभाविक पनि हो । हामी केही थाकेका थियौं । त्यति बेलामा मर्जर कुरा आयो । मर्जरले अरु कम्पनीलाई हाम्रो नजिक बनाएको पक्कै हो । मर्जरले बनाएको त्यति मात्रै हो । हाम्रो नजिक आउँदा कतिपय कम्पनीहरुलाई निकै ठूलो लाभ भएजस्तो लाग्या छ । तर, शिखर इन्स्योरेन्सले पनि आफ्नो गति घटाएको छैन् । हामी आफ्नै ‘रेस’मा छौं । अरुले चुक्ता पुँजी र कर्मचारीहरु जोडेका मात्र हुन् । तपाइँहरु सम्झिनुस् त यो बजारमा दाबी कसरी तिर्ने ? भनेर सिकाउने पनि शिखर इन्स्योरेन्स हो । बजार बिस्तार गर्नेदेखि ठूलो क्यापिटलले ‘रिटेन्सन’ बढाउने भन्ने शिखर इन्स्योरेन्स हो । सिकाएको त होनी । यसमा त कसैको दुईमत छैन् । अरुले सिके मात्रै । म गौरवका साथ भन्छु हामीले बीमा बजारलाई जे दिएका छौं, त्यो त अरुले पछ्याएको मात्रै हो ।

भनेपछि बजार परिदृश्य परिवर्तन भएको बेलामा पनि शिखर इन्स्योरेन्स चाहिँ आफ्नो पूरानै गतिमा हिडिरहन्छ ? 
फेरि त्यस्तो पनि होइन । शिखर इन्स्योरेन्सले दूरदर्शी नजर लगाउँछ । यो मर्जर हुने आँकलन त हाम्रो बोर्डले आजभन्दा चार वर्ष अघि गरिसकेको थियो । 

प्रतिस्पर्धाको दौडमा दौडिँदा शिखर इन्स्योरेन्सलाई ‘गियर’ परिवर्तन नगरे पनि कसैले उछिन्दैन भन्ने यहाँहरुको सोच हो र ? 
कहिलेकाहीं ‘गियर’ फेर्नुपर्ला । हिँडेपछि एउटै गियरमा चलाउने बाटो पनि त नहुनसक्छ । कहिलेकाहीं एक–दुई गियरमा हिँडिरहेको मान्छे आठ–नौ गियर लगायर दौडिरहेको पनि देख्नुभएकै होला । प्रतिस्पर्धामा खरो उत्रिन हामी पनि च्याम्पियन छौं । माहिर नै छौं । धेरै पटक गियर तलमाथि गरेको हामीसँग पनि थुप्रै अनुभवहरु छन् । त्यसैले यो हाम्रो लागि नौलो कुरा होइन । अरु कम्पनीबारे मैले केही पनि बोल्दिन् । शिखरको हकमा त हामीले बीमालेखको विविधिकरण गरेका छौं । विविधिकरण गर्नु भनेको बीमा कम्पनीहरुको लागि राम्रो कुरा हो । हामीले शाखाहरु थपेकै अवस्था छ । अहिलेको गृहकार्यले तपाइँले भन्याजस्तो अबको दुई वर्षमा नै शिखर इन्स्योरेन्सलाई एउटा गज्जबकै गियरमा दौडाईरहेको हुन्छ । त्यो चाहिँ पक्का छ । 

आर्थिक मन्दीको असर बीमा क्षेत्रमा कत्तिको देखिएको छ ? तपाइँहरु कत्तिको प्रभावित हुनुभएको छ ? 
आर्थिक मन्दीले अर्थतन्त्रलाई नै हानेको छ । यसले बीमालाई मात्रै भनेर प्रहार गरेको अवस्था छैन् । मन्दी भयो भनेर बीमा प्रभावित भएको भन्दा पनि मन्दीले देशको आर्थिक अवस्था संकुचन गर्दा कता कता बीमा पनि अब अछुतो चाहिँ छैन है भन्ने अवस्था हो । 

लघुबीमा कम्पनीहरु तपाइँहरुको साथी हुन कि कट्टर प्रतिस्पर्धी हुन् ? 
यसमा त दुवै हुन । लघुबीमा दुवैले गर्ने हुँदा साथी हुन् । फेरि एउटै व्यवसायमा जोडिनुपर्ने कार्यप्रकृतिले त लघुबीमा हाम्रा प्रतिस्पर्धी पनि हुन् । यसमा लघुबीमा आफैमा अन्तर्राष्ट्रिय अभ्यास हो । नेपालमा पनि त्यही अवधारणा ल्याइएको हो । अब त्यस्तो अवधारणा कत्तिको सफल हुन्छ ? भन्ने त समयले पनि बताउला । जसरी हाम्रो दैनिक जीवनमा तपाइँलाई कही जानु छ भने जाममा अकिने भन्दा पनि वैकल्पिक बाटो खोज्ने त हो । त्यस्तै बीमाको व्यवसायलाई कतैबाट प्रभाव पार्यो भने त्यसमा बीमा कम्पनीले पनि विकल्प सोच्छ । हामीले पनि गर्ने त्यही नै हो ।

नेपाल बीमा प्राधिकरणले पूराना बीमा कम्पनीहरुले लघुबीमा व्यवसाय गर्न सकेन भन्ने आरोप लागाउँदै आएको छ नि ?
अरु बीमा कम्पनीहरुको हकमा होला । हाम्रो कम्पनीमा त गत आर्थिक वर्षमा पाँच अर्ब २५ करोड रुपियाँ कुल व्यवसायमा हामीले झण्डै ५८ करोड रुपियाँ बराबरको लघुबीमा गरेका छौं । यो भनेको हाम्रो व्यवसायको करिब १० प्रतिशत व्यवसाय लघुबीमाले धानेको छ । बीमा प्राधिकरणले पुराना कम्पनीसँग गरेको अपेक्षा पनि त्यति नै थियो । अब तपाइँको प्रश्नअनुसार शिखर इन्स्योरेन्सलाई त्यो आरोप लाग्दैन । 

लघुबीमा व्यवसाय शिखर इन्स्योरेन्समा धेरै छ भन्ने तपाइँ दाबी गर्न सक्नु हुन्छ ?
किन सक्दिन त ? हाम्रो देखिहाल्नु भयो त ‘फिगर’ । 

त्यसो भए लघुबीमा कम्पनीहरु खडा गर्दा सबैभन्दा धेरै घाटा पनि त तपाइँहरुलाई नै गर्ने देखियो नि ?
लघुबीमा कम्पनीले हामीलाई सहयोग नै गर्छन । किनभने हामीले पहिले लघुबीमा सुरु गरेको हो भने कैयौंको दाबी भुक्तानी तिरेर विश्वास जितिसकेको अवस्था छ । नयाँ लघुबीमा कम्पनीहरु भर्खर बजार बिस्तारमा लागेको अवस्था छ । गाउँमा चल्न खुलेका कम्पनीहरुलाई हामी जत्तिको ‘रिटेन्सन’ भएको कम्पनीहरु प्रतिस्पर्धा हुन्छ भन्ने तपाइँहरुकै आँकलन चाही नमिल्ला । हामीले त कहिले पनि लघुबीमा कम्पनीहरुले ठूला बीमा कम्पनीहरुसँग प्रतिस्पर्धा गर्न आएको हो भनेको सुनेका छैनौ । 

एउटै बजारमा, एउटै प्रकृतिको व्यवसाय गर्दा व्यवसाय खोसाखोस त अवश्य हुने भयो त ?
ए, नविन जी ! २० वटा निर्जीवन बीमा कम्पनीहरुसँग प्रतिस्पर्धा गरेर अबल्ल उत्रिएको शिखर इन्स्योरेन्सलाई लघुबीमा कम्पनी आयो भनेर नअत्याउनुस् । हामी व्यवसाय घट्ला भनेर आत्तिने कम्पनीमा पर्दैनौ । दाबी तिर्ने क्षमता बनाएर बसेका बीमा कम्पनीलाई बजारको परिस्थीतिले धेरै प्रभाव पार्दैन । अहिलेसम्म शिखर इन्स्योरेन्सले कमाएको पनि त्यही हो । 

अब अन्त्यमा, शिखर इन्स्योरेन्समा नै किन बीमा गर्ने ?
शिखर इन्स्योरेन्स बीमा क्षेत्रमा विरासत बोकेर बसेको कम्पनी हो । धेरै वटा कुरामा अन्य कम्पनीहरुलाई समय सान्दर्भिक नेतृत्व समेत गर्दै आएको कम्पनी हो । अझ भनौ शिखर इन्स्योरेन्स त आजको दिनसम्म अधिकांश सूचकमा अब्बल कम्पनी हो । यस्तो हुनुको कारण भनेकै बीमितहरुको विश्वास हो । बीमितको विश्वास कुनै पनि कम्पनीले कमाउँछ भने त्यसको पछाडी त उसले समयमा दाबी तिरेको कारण नै मुख्य हुनजान्छ । हामी सुशासनमा विश्वास गर्ने कम्पनी हौं । बीमा बजारलाई जति धेरै निकायले कडाई गर्दै जान्छ, त्यसको सबैभन्दा धेरै लाभ शिखर इन्स्योरेन्सलाई हुन्छ । बजारमा केही ‘प्लेयर’हरु अवस्थ रहेको खबरहरु पनि आउने गर्छन् । त्यस्ता कार्यले बीमा व्यवसाय र जनविश्वास घटाउँछ । शिखर इन्स्योरेन्स जनविश्वास जित्दै आएको र तपाइँहरुको आफ्नै कम्पनी जस्तो भएकाले बीमा गर्नको लागि यो उपयुक्त ठहरिँदै आएको छ । अहिले हेर्नु भयो भने नेपालमा नाम चलेका घरानाहरु, ठूला भनिएका बैंक, होटल, अस्पताल, हवाई जहाज सबैको बीमा हाम्रोमा छ । किनकी हामीसँग समयमै त्यसको दाबी भुक्तानी तिर्ने क्षमता पनि छ । कुनै पनि बीमितले बीमा गर्नुअघि हेर्ने भनेको त बीमा कम्पनीको अवस्था हो र त्यो अवस्थामा शिखर इन्स्योरेन्स आजको दिनमा नम्बर वानमा  छ । हामीले नयाँ नयाँ प्रोडक्ट ल्याएका छौं । प्रविधिमैत्री सेवालाई जोड दिँदै आएका छौं । अझ भनौ हाम्रो डेटा हेर्नु भयो भने पनि पुगिहाल्छ । नियामकले निर्धारण गरेको चुक्ता पुँजी हाम्रो पुगिसकेको छ । हामीसँग सबैभन्दा बढी महाविपत्ति कोष छ । अरुले जम्मा एक अर्ब रुपियाँ बराबरको महाविपत्ति फण्ड बनाउन मुस्किल पर्दा शिखर इन्स्योरेन्सले आठ अर्ब रुपियाँ भन्दा धेरैको कोष बनाईसकेको छ । यो आधारमा हेर्दा भूकम्प आयो भने शिखर  इन्स्योरेन्सले अन्य कुनै दोस्रो कम्पनी भन्दा आठ गुणा चाँडो र भरपर्दो रुपमा दाबी तिर्न सक्छ । पहिले पनि अरुले काजगपत्रमा अल्झाउँदा भूकम्प गएको १४ दिनभित्र हामीले दाबी भुक्तानी दिन सुरु गरेका थियौं । यो कुरा आम नागरिक र बीमितहरुले बुझ्दै आउनुभएको कुरा पनि हो ।