विद्युत् आयात १८ प्रतिशतले घट्यो, साढे ४ महिनामा आयो ११ अर्बको भारतीय बिजुली

काठमाडौं । नेपालले चालु आर्थिक बर्ष २०८०–८१ को चैत मसान्तसम्म भारतबाट १० अर्ब ९३ करोड ७८ लाख रुपियाँको विद्युत् आयात गरेको छ । 

हिउँदका कारण खोलामा पानी कम भएर स्वदेशी उत्पादन घटेपछि नेपाल विद्यत् प्राधिकरणले मंसिर २१ गतेबाट भारतदेखि बिजुली आयात गर्न सुरु गरेको थियो । 

यद्यपि, यो गत आवको सोही अवधिको तुलनामा १७.८६ प्रतिशतले कम हो । गत आवको यसै अवधिमा भारतबाट १३ अर्ब ३१ करोड ७२ लाख रुपियाँको विद्युत् आयात भएको थियो । गत आवभर भने १९ अर्ब ९ करोड २१ लाख रुपियाँको विद्युत् आयात भएको थियो । 

समीक्षा अवधीमा नेपालबाट हुने विद्युत् निर्यात भने ४७.४ प्रतिशतले बढेको छ । प्राधिकरणले चालु आवमा साउनदेखि मंसिर २० गतेसम्म भारतमा विद्युत् निर्यात गरेको थियो । त्यसबाट १२ अर्ब ३४ करोड ४१ लाख रुपियाँको विद्युत् निर्यात भएको थियो । यो समीक्षा अवधीमा आयात भएको बिजुली भन्दा पनि बढी हो । साथै, गत आवको समीक्षा अवधीमा ८ अर्ब ४३ करोड ७९ लाख रुपियाँको विजुली निर्यात भएको थियो । 

गत आवभरमा भने १० अर्ब ४२ करोड ९५ लाख रुपियाँको विद्युत् निर्यात भएको थियो । गत आवको विद्युत् आयात निर्यातमा नेपाल घाटामा गएको थियो । यसपाली भने नाफामा जाने प्राधिकरणको विश्वास छ । 

नेपालमा नदी प्रवाहमा आधारित जलविद्युत् आयोजना छन् । बर्खामा खोलामा पानी बढी हुदाँ पूर्णक्षमतामै विद्युत् उत्पादन गर्न सकिन्छ । त्यसबेला भारतमा विद्युत् निर्यात गर्ने पुग्छ । तर, हिउँदमा खोलामा पानी कम हुदाँ विद्युत् उत्पादन पनि कम हुन्छ । यसबेला भने स्वदेशी उत्पादनले नपुगेर भारतबाट विद्युत् आयात गर्नुपर्छ । यसपाली हिउँदमा मंसिर २१ गतेदेखि विद्युत् आयात सुरु भएको थियो । 

यद्यपी, नेपाल यही जेठ वा असारदेखि नेपाल विद्युत् निर्यात गर्ने अवस्थामा पुग्नेछ । अब गर्मीका कारण हिउँ पग्लेर खोलामा पानीको सतह बढ्नेछ । त्यसले विद्युत् उत्पादन बढाउन सहयोग गर्नेछ । असार लागेसँगै बर्खा सुरु हुनेछ, त्यसपछि विद्युत् उत्पादान थप बढ्ने छ ।