बिहीबार १५ कात्तिक, २०८१ | Thursday Oct 31, 2024
काठमाडौं । यस वर्ष रुकुम पूर्वबाट साठी क्विन्टल भीरमह निकासी भएको छ । वैशाखदेखि जेठ महिनाको अवधिमा भीर मह निकाल्ने गरिन्छ ।
यो अवधिमा साठी क्विन्टल भीर मह निकासी भएको जिल्ला वन कार्यालयले जनाएको छ ।
पुथाउत्तरगङ्गा, भूमे र सिस्ने तीन वटै गाउँपालिकाका विभिन्न ठाउँमा भीर मौरी पाइन्छ । जिल्लाका विभिन्न ठाउँबाट सङ्कलन गरिएको भीर मह जिल्ला बाहिर निकासी भएको हो । मह निकाल्ने र निकासी गर्ने ठेक्कामार्फत गर्ने गरिएको छ ।
गत वर्षहरूको तुलनामा यो वर्ष मह केही वृद्धि भएको डिभिजन वन कार्यालयका रेन्जर विश्व केसीले बताए । ६० क्विन्टल भीर मह निकासीको लागि व्यापारीले अनुमति पुर्जी लिएका हुन् । ६० क्विन्टल मह नै निकासी भइसकेको रेन्जर केसीले जानकारी दिए ।
प्रतिकिलो २० रुपियाँको दरमा निकासी गर्ने व्यापारीबाट राजस्व लिने गरिएको डिभिजन वन कार्यालयले बताएको छ । जसमा साठी क्विन्टलबापतको कार्यालयमा राजस्व एक लाख २० हजार रुपियाँ सङ्कलन भएको छ ।
गत वर्ष ५० क्विन्टल भीर मह निकासी भएको थियो । यस वर्षप्रति किलो मह एक हजार रुपियाँ भाउमा बिक्री भएको भूमे गाउँपालिका–२ काँक्रीका ध्रुव बुढामगरले बताए ।
