काठमाडौंः सेयर बजार परिसुचक नेप्से आज मंगलबार १७ दशमलव ३९ अंकले घटेर एक हजार ४१३ दशमलव ७१ अंक कायम भएको छ । गएको आइतबार पनि झण्डै दोहोरो अंकले घटेको नेप्सेको घटने दर आज झन बढेको हो ।
बजारमा आज पनि कारोबार बढन सकेन । आज ३६ करोड २२ लाख रुपियाँको मात्रै सेयर किनबेच भएको छ, जुन निकै न्यून हो । सेयर बजारमा मूल्य अभिवृद्धि कर लागू गर्ने संकेत, वामपन्थी दलहरुको नेतृत्वमा बन्ने सरकार र उसले लिने अर्थनीतिप्रतिको आशंका, अधिकांश कम्पनीहरुको हकप्रद सेयर जारी भइसक्नु जस्ता कारणले सेयर बजारमा लगानी आकर्षित हुन नसकेको विश्लेषकहरुको भनाई छ ।
सेयर बजार लगातार गिरावट र अनिश्चितताले लगानीकर्ता पर्ख र हेरको स्थितिमा बस्न बाध्य भएका छन् । आजको कारोबारमा कुनै पनि समूहको कारोबार राम्रो हुन सकेन । सबैभन्दा जलविद्युत समूहको उपसुचक पाँच प्रतिशतभन्दा बढिले घटेको छ भने होटल, वित्त र बिमाबाहेक बाँकी सबै कम्पनीको उपसुचक एक प्रतिशतभन्दा बढिले गिरावट भएको छ ।
कारोबार न्यून हुँदा पनि सानिमा माई हाइड्रोपावरको कारोबार पाँच करोड ४५ लाख भन्दा बढिको सेयर किनबेच भएको छ । आज कुल १५४ कम्पनीको सेयर किनबेच भएकोमा २१ कम्पनीका लगानीकर्ताले मात्रै कमाई गरेका छन् भने बाँकीले घाटा सहनुपरेको छ । केही दिनअघि एक हजार चारसयबाट ओर्लिएको नेप्सेमा नियामक निकाय राष्ट्र बैंकले तरलता व्यवस्थापनका लागि लिएको निर्णयपछि केही सुधार आएर लय लिए पनि फेरि एक हजार चारसयबाट ओर्लिने संकेत देखिएको छ ।