काठमाडौंः कर नतिरेर पटक पटक विवादमा फँस्दै आएको गोर्खा ब्रुअरीले करोडौं रुपियाँ खर्चिएर भारतीय नायक सलमान खानसहित आधा दर्जन भारतीय रंगकर्मीलाई नेपाल ल्याउने तयारी गरेको छ । बहुर्राष्ट्रिय कम्पनी कार्सबर्गको ८० प्रतिशत लगानी रहेको गोर्खा ब्रुअरीले सलमानलाई मात्रै ११ करोड रुपियाँ तिरेर नेपाल ल्याउन लागेको हो ।
बहुर्राष्ट्रिय कम्पनी कार्सबर्गको ८० प्रतिशत लगानी रहेको गोर्खा ब्रुअरीले करोडौं रुपियाँ अन्तःशुल्क र मूल्यअभिवृद्धि कर नतिरेपछि कर कार्यालयले उक्त कम्पनीलाई जरिवानासहित कर निर्धारण गरेपछि कम्पनीले अहिले कर कार्यालयविरुद्ध सर्वोच्च अदालतमा मुद्दा हालेको छ ।
उक्त मुद्दामा कम्पनी र कर कार्यालय दुवैलाई सर्वोच्च अदालतले आउँदो फागुन १५ गते हाजिर हुन भनेको छ । यसअघि डा. बाबुराम भट्टराई अर्थमन्त्री हुँदा पनि ९० करोड रुपियाँ कर छलेपछि कार्सबर्ग ग्रुपले आफूहरुले नभई खेतान समूहले नतिरेकोले उसैले तिर्नुपर्छ भनेपछि खेतान ग्रुपले कर तिरेको थियो ।
छली गरेको ९० करोड कर तिरेपछि करिव टाट पल्टिएको खेतान समूहले गोर्खा ब्रुअरीको आफ्नो ५० प्रतिशत हिस्साबाट ३० प्रतिशत सेयर कार्सबर्ग समूहलाई नै बिक्री गरेको थियो । सँगसँगै उक्त समयसम्म खेतान समूहले सम्हाल्दै आएको कम्पनीको व्यवस्थापन पनि कार्सबर्ग ग्रुपले खोसेर आफैले सञ्चालन गर्दै आएको छ ।
तर, कार्सबर्ग ग्रुप आफैले व्यवस्थापन लिएपछि पनि करछली विवादमा पर्दै आएको छ । चुडामणि शर्मा संलग्न कर फच्र्यौट आयोगबाट ८६ करोड रुपियाँ भन्दा बढि छुट लिएको गोर्खा ब्रुअरीले आर्थिक बर्ष २०७१–७२ मा वियरहरु बिक्री गरेवापत कर नतिरेपछि कर कार्यालयले कर निर्धारण गरेको थियो ।
बारम्बार कर छली गर्ने, निर्धारण गरिएको कर पनि नतिर्ने र पहुँचको आधारमा छुट गराउँदै आएको गोर्खा ब्रुअरीको लगानीकर्ता कार्सबर्ग ग्रुप आफै पनि कर छल्न संलग्न रहेको पुष्टि भएको छ । नियमानुसार सरकारलाई कर नतिरी अदालतमा मुद्दा हालेको कम्पनी आफैले भने करोडौं रुपियाँ खर्चिएर सलमानलाई नेपालमा नचाउने तयारी गरेको छ ।
त्यसका लागि उसले करोडौं रुपियाँ प्रवद्र्धनमा समेत खर्च गरिरहेको छ । यस विषयमा सोध्न खोज्दा कम्पनीका आधिकारिक कर्मचारीहरु वैभव शर्मा र सुबोध शर्माले कुरा गर्न मानेनन् । आउँदो मार्ग १० मा नेपाल आउने र सैनिक मञ्च अगाडि कन्सर्ट आयोजना गर्ने भन्दै महंगो मूल्यमा टिकट बिक्री गरिरहेको छ ।
