काठमाडैंः प्रधानमन्त्री केपी शर्मा ओलीले मुगुको रारा तालबाट वैशाख १ गते देशवासीका नाममा सम्बोधन गर्ने भएका छन् । कर्णाली प्रदेशले आयोजना गर्ने ‘पर्यटन वर्ष २०७५’ को उद्घाटन गर्न उनी प्रमले नयाँ वर्षमा देशवासीलाई राराबाट सम्बोधन गर्ने भएको हुन् ।
नेपाल ट्रेड यूनियन महासंघ (जिफण्ट)को सातौ महाअधिवेशनको मंगलबार उद्घाटन गर्दै प्रधानमन्त्री ओलीले सो जानकारी दिएका हुन् ।
“कर्णाली प्रदेशले आयोजना गरेको पर्यटन वर्ष २०७५ को पहिलो पर्यटक म नै हुन्छु”, प्रधानमन्त्री ओलीले भने, “राराबाट यसपालि पर्यटनको बिगुल बजाइनेछ ।”
प्रधानमन्त्री ओलीले सरकारले कसैलाई दमन नगर्ने तर जनतालाई दुःख दिने, आतंक फैलाउनेलाई नछाड्ने बताए ।
सरकारका हरेक अभियान हमलाको शैलीमा अघि बढ्ने भन्दै उनले यसपाली आफैं एकजना बालिकालाई विद्यालय भर्ना गराउने र अरु जनप्रतिनिधिलाई पनि त्यसै गर्न लगाउने बताए ।
समृद्ध नेपालको मुख्य आधार पर्यटन भएकाले त्यसको प्रवद्र्धनमा सबै क्षेत्र लाग्नुपर्नेमा प्रधानमन्त्रीले जोड दिए ।
