काठमाडौंः काँग्रेस नेता एनपी साउदले भारतीय प्रधानमन्त्री नरेन्द्र मोदीको दुई दिने नेपाल भ्रमणलाई आफ्नो पार्टीले स्वागत गर्दै सफल बनाउन सहयोग गर्ने बताएका छन् । तर मोदीको भ्रमण सफल बनाउने काम भने खासमा सरकारको भएको बताएका छन् ।
रिपोर्टर्स क्लवमा सोमबारसाउदले मोदीको भ्रमणले नेपाल–भारत द्धिपक्षीय सम्बन्धमा थप हार्दिकता आउने दावी गरे । उनले भने, ‘भ्रमण सफल बनाउनको लागि सरकारले यथेष्ट गृहकार्य गर्नुपर्छ । सायद गरेको होला पनि । भ्रमणलाई उच्चतम हितमा प्रयोग गर्नुपर्छ ।’
नेता साउदले मोदीको भ्रमण औपचारिक रुपमा काठमाडौंबाट भएको भए राम्रो हुनेथियो भन्ने प्रतिक्रिया दिए । उनले थपे, ‘औपचारिक भ्रमण काठमाडौंबाट सुरु भएको भए राम्रो हुनेथियो । काठमाडौंपछि जनकपुर हुँदै मुक्तिनाथ गएको भए राम्रो हुनेथियो । किनकी केन्द्रीय सरकार त काठमाडौंमा छ । जे भएपनि उहाँको भ्रमणलाई हामीले सकारात्मक रुपमा लिनुपर्छ ।’
यसअघि नेपालका प्रधानमन्त्री केपी ओली भारत भ्रमणमा जानुअघि यसपटक केही पनि नयाँ सम्झौता नहुने भनेर गएको भएपनि नेपाल र नेपालीहरुलाई झुक्याएको साउदले बताए । उनले थपे, ‘भारत उड्नुअघिसम्म उहाँले यसपटक नयाँ केही हुँदैन भन्नुभएको थियो । तर, उहाँले जलमार्ग र रेलमार्ग लगायतका सम्झौता गर्नुभयो । उहाँले हामीलाई झुक्याउनुभयो ।’
मोदीको भ्रमणलाई सरकारले पारदर्शी बनाउनुपर्ने पनि उनको सुझाव छ । साउदले थपे, ‘भ्रमणबाट नेपाली जनताले के–के पाए ? अथवा के के दिए ? अथवा राष्ट्रिय हितमा काम भयो कि भएन ? भन्नेबारे सरकारले पारदर्शीता अपाउनुपर्छ ।’
त्यतिमात्रै नभएर मोदी भ्रमणबारे जारी संसदलाई पनि यथेष्ट जानकारी वर्तमान सरकारले गराउनुपर्ने उनले जिकिर गरे । साउदले नेपालमा हुँदा ठूला कुरा गर्ने दिल्लीमा जाँदा लम्पसार हुने अथवा ‘बोनलेस’ हुन नहुने सुझाव प्रधानमन्त्री ओलीलाई दिए । भारतसँग रहेको डरलाग्दो व्यापार घाटा घटाउनको लागि सरकारले आफ्नो संभावनाका क्षेत्रहरु पहिल्याउनुपर्ने पनि नेता साउदको सुझाव छ ।
