काठमाडौं । सरकारको निगरानी गर्न कांग्रेसले गठन गर्न लागेको छाया सरकारमा मन्त्री बन्न सांसदले उत्साहजनक सहभागिता देखाएका छैनन् । रुचि भएका तीनवटा मन्त्रालयको नाम मागेको ६ दिन हुँदासमेत ६३ मध्ये १० सांसदले मात्र नाम टिपाएका छन् । सांसदलाई नाम टिपाउन कांग्रेसले एक हप्ताको समय दिएको थियो ।
संसदीय दलको २४ पुसको बैठकले प्रधानमन्त्रीसहित सबै मन्त्रालयको काम–कारबाही नजिकबाट निगरानी गर्न छाया सरकार गठन गर्ने निर्णय गर्दै नाम टिपाउन सांसदलाई आग्रह गरेको थियो । प्राथमिकताका आधारमा तीन मन्त्रालय छान्न कांग्रेसले ६३ सांसदको नामसहितको फाराम २४ पुसदेखि दलको कार्यालय सिंहदबार र संसद् भवन बानेश्वरमा राखेको छ । कांग्रेसले मन्त्रालयगत संयोजक र तीनजनासम्म सदस्य बनाएर छाया सरकार चलाउने तयारी छ ।
साथीहरूले नाम दिएपछि छाया सरकार बन्छः बडू
प्राथमिकतामा राखेर एक हप्ताभित्र तीन–तीनवटा मन्त्रालयको नाम दिन भनेका हौँ । साथीहरूले टिपाइरहनुभएको छ । नाम आएपछि दलको कार्यसमितिले छाया सरकारमा मन्त्रालय हेर्ने संयोजक र सदस्य तोक्छ । निवेदन दिने समय सकिएपछि हामी छाया सरकार टुंग्याउँछौँ ।
संसद्को राज्यव्यवस्था समितिमा छु, त्यसैले गृह मन्त्रालय रोजेँः दिलेन्द्रप्रसाद बडू
हामी राज्य व्यवस्था समितिमा छौँ । एउटा समितिमा बस्ने र अर्को मन्त्रालय रोजेर काम छैन । अर्को मन्त्रालय रोज्दा उसका काम–कारबाही र विधेयकबारे पनि जानकारी हुँदैन । तसर्थ आफ्नो समितिअन्तर्गतको मन्त्रालयका कामबारे धेरै जानकारी हासिल गर्न र सरकारलाई खबरदारी गर्न समिति जोडिने मन्त्रालय छानेको हुँ । अर्को मन्त्रालय रोज्दा समितिका लागि एउटा तयारी र छाया सरकारका लागि अर्को तयारी गर्दा विषय बाझिन्छ र काम प्रभावकारी हुँदैन ।
रक्षा मन्त्रालय चलाइसकेको छु, शिक्षामा पनि रुचि छः भीमसेनदास प्रधान
मैले यसअघि पनि रक्षा मन्त्रालय चलाइसकेको छु । शिक्षामा पनि रुचि छ । आफूलाई अनुभव भएको र काम गर्न सहज हुन्छ भनेर मैले यी मन्त्रालय रोजेको हुँ । आफूले काम गरिसकेको मन्त्रालयको जानकारी धेरै हुने भएकाले सरकारका कामलाई नजिकबाट निगरानी गर्न सजिलो हुन्छ ।
दुई–दुईपटक गृह राज्यमन्त्री भएँ, त्यसैले गृह मन्त्रालय छानेँः देवेन्द्रराज कँडेल
म सँग दुई–दुईपटक गृह राज्यमन्त्री भएर चलाएको अनुभव छ । साथै, मेरो अनुभव, रुचि र स्वभावले पनि गृह मन्त्रालयलाई मैले पहिलो प्राथमिकतमा राखेको छु । नजिकबाट निगरानी गर्न सक्ने, आफ्नो पफर्मेन्स देखाउन सक्ने भएकाले पनि गृह मेरो रोजाइमा परेको छ । पछिल्ला समय हत्या, हिंसा, बलात्कारका घटनामा राज्यका संयन्त्रले दोषी पत्ता लगाउन सकेका छैनन् । यस्ता घटनामा सरकारलाई थप सचेत बनाउन दबाब दिन सकिन्छ भन्ने मलाई लागेको छ ।
म पनि राज्यव्यवस्था समितिमा छु, त्यसैले गृह र रक्षा मन्त्रालय मागेँः डिला संग्रौला
राज्य व्यवस्था समितिअन्तर्गत नै संघीय मामिला तथा सामान्य प्रशासन, गृह, रक्षा मन्त्रालय पर्छन् । मन्त्रालयको काम–कारबाही, विधेयकबारे पनि धेरै जानकारी भइसकेको छ । त्यसकारण काम गर्न सहज हुन्छ भनेर यी मन्त्रालय छानेकी हुँ । पछिल्लो समय हत्या र हिंसाका घटनामा जवाफदेही र जिम्मेवारी ढंगले राज्यले काम गर्न सकेको छैन । प्रभावकारी खबरदारी गर्न यी मन्त्रालय रोजेकी हुँ ।
विकासमा तराई पछाडि परेकाले भौतिक मन्त्रालय छानेँ स् देवप्रसाद तिमल्सेना
विकासको दृष्टिले तराई धेरै पछाडि परेको छ । त्यसैले मैले भौतिक पूर्वाधार मन्त्रालय छानेको हुँ । विकासकै दृष्टिले पनि रौतहट धेरै नै पछाडि छ । ७७औँ स्थानमा छ । त्यसैले सरकारलाई थप दबाब दिएर काम गर्न सकिन्छ भनेरै मैले यो मन्त्रालयलाई पहिलो नम्बरमा राखेको हुँ । अरूले के गर्नुभयो थाहा छैन । तर, पार्टीले भनेपछि मैलेचाहिँ समयमै फारम भरिदिएँ ।
आजको नयाँपत्रिका दैनिकबाट ।
