आर्थिक मन्दी र व्यावसायिक वातावरण नभएको प्रचार नगरौंः सभामुख घिमिरे

काठमाडौँ । सभामुख देवराज घिमिरेले सरकार र निजी क्षेत्रबीचको सौहार्दपूर्ण सम्बन्धको जगमा औद्योगिक वातावरण बनाउन अपिल गरेका छन् । 

नेपाल उद्योग वाणिज्य महासंघद्वारा आयोजित  नवौं नेपाल अन्तर्राष्ट्रिय व्यापार मेलाको आज उद्घाटन गर्दै सभामुख घिमिरेले आर्थिक मन्दी र व्यावसायिक वातावरण नभएको प्रचार गरी मुलुकको अर्थतन्त्र कमजोर बनाउने भन्दा पनि सरकार र निजी क्षेत्रबीचको सौहार्दपूर्ण सम्बन्धको जगमा औद्योगिक वातावरण बनाउन अनुरोध गरेका हुन् । 

उनले अर्थतन्त्रका समस्या समाधान गर्न राजनीतिक प्रतिबद्धतासहितको लगानीमैत्री वातावरण निर्माण गर्न सरकारले विशेष भूमिका निर्वाह गर्नैपर्ने बताए । सभामुखको हैसियतले लगानीमैत्री कानून निर्माणको नेतृत्वका लागि मेरो प्रयत्न हुनेछ ”, उनले भने । 

कोभिड महामारीले थलिएको अर्थतन्त्र सुधार गर्न, नेपाली व्यवसायीहरुको आत्मविश्वास बढाउन र लगानीमैत्री वातावरण बनाउँदै आर्थिक गतिविधि वृद्धि गर्न मेला सफल हुने विश्वास सभामुखले व्यक्त गरे ।  

महासंघका उपाध्यक्ष सुरकृष्ण वैधले विश्वमा नेपाललाई लगानीको मुख्य गन्तव्यको रुपमा विकास गरी लगानी आर्कषण गर्नु मेलाको उद्देश्य भएको बताए ।

देशमा आर्थिक मन्दी र बढदो व्यापारघाटाप्रति चिन्ता व्यक्त गर्दै निर्यात बढाउनका उत्पादनको प्रर्वद्धन बढाउनुपर्नेमा उनले जोड दिए । 

सार्क उद्योग वाणिज्य संघका उपाध्यक्ष चण्डिराज ढकालले नेपाली उत्पादनलाई बजारमा पुर्याउन विशेष प्रयास हुनुपर्ने र त्यसका निम्ति निजी क्षेत्र र सरकारबीच सहकार्य हुनुपर्ने बताए । 

चीनको वाणिज्य मन्त्रालयअन्र्तगतको व्यापार विकास ब्यूरोका उपमहानिर्देशक देङ् बीले मेलामार्फत दुई देशबीचको व्यापारिक सम्बन्धलाई अझ बलियो बनाउने बताए ।   
         
नेपालका लागि चीनका राजदूत छन सङसहित उद्योग वाणिज्य क्षेत्रसँगसम्बन्धित मुलुकका सङ्गठित संघसंस्थाका प्रमुख तथा प्रतिनिधिको सहभागिता थियो । 

यही मङ्सिर १८ गतेसम्म सञ्चालन हुने मेलामा  नेपालसहित बङ्गलादेश, भारत, चीन र पाकिस्तानका दुई सय १० वटा प्रदर्शनीकक्ष छन् । 

मेला नेपाल सरकार उद्योग वाणिज्य तथा आपूर्ति मन्त्रालय र व्यापार तथा निकासी प्रवद्र्धन केन्द्रको सहकार्यमा आयोजना भएको हो । मेलाको सह आयोजकमा ललितपुर उद्योग वाणिज्य संघ र नेपाल हस्तकला महासंघ रहेका छन् । मेलाको करिव १ लाख आगन्तुकहरुले अवलोकन गर्ने अपेक्षा गरिएको छ ।