काठमाडौं । नेपाल राष्ट्र बैंकले तरलता व्यवस्थापन गर्न ५० अर्ब रुपियाँको निक्षेप संकलन उपकरण जारी गर्ने भएको छ । २१ दिनका लागि उक्त उपकरण प्रयोग गर्न लागेको राष्ट्र बैंकले जनाएको छ ।
निक्षेप संकलन बोलकबोल आज शुक्रबार (चैत ९ गते) हुनेछ ।
इच्छुक बैंक तथा वित्तीय संस्थाले आज दिउँसो १२ बजेसम्म बोलकबोलमार्फत आवेदन दिनुपर्नेछ ।
बजारमा रहेको अधिक तरलता व्यवस्थापनका लागि राष्ट्र बैंकले निक्षेप संकलन उपकरण प्रयोग गर्दै आएको छ । साँवा र ब्याज भुक्तानी भने चैत ३० गते हुने बताइएको छ ।
साथै, यसको ब्याजदर भने बोलकबोल बाटै निर्धारण हुनेछ । बैंक तथा वित्तीय संस्थाहरुले न्यूनतम १० करोड र अधिकतम पाँच करोड रुपियाँले भाग गर्दा निःशेष भाग जाने गरी निष्कासित रकमबराबर बोलकबोल गर्न सक्नेछन् ।
निक्षेप संकलनका लागि आह्वा गरिएको रकम बाँडफाँट गर्दा बोलकबोलबमोजिम सबैभन्दा कम ब्याजदरलाई पहिलो प्राथमिकतामा राखी आह्वा गरेको रकमसम्म क्रमशः बाँडफाँट गरिने पनि राष्ट्र बैंकले जनाएको छ ।