शुक्रबार ४ जेठ, २०८१ | Friday May 17, 2024
काठमाडौं । हिमालयन लघुवित्त वित्तीय संस्था लिमिटेडको खुद नाफा बढेको छ । लघुवित्तले प्रकाशित गरेको चालू आवको तेस्रो त्रैमाससम्मको अपरिष्कृत वित्तीय विवरणअनुसार खुद नाफा बढेको हो ।
समीक्षा अवधिमा लघुवित्तले १ करोड १३ लाख रुपियाँ खुद नाफा कमाएको छ । यो गत आवको सोही अवधिको तुनलामा ७३.८७ प्रतिशतले बढी हो । गत आवको सोही अवधिमा लघुवित्तले ६५ लाख रुपियाँ नाफा कमाएको थियो ।
खुद ब्याज आम्दानी सामान्य बढे पनि इम्पेरमेन्ट चार्ज घटेका कारण लघुवित्तको खुद नाफा उल्लेख्य बढ्न पुगेको हो ।
चालू आवको चैत मसान्तसम्म लघुवित्तको खुद ब्याज आम्दानी ४.४६ प्रतिशतले बढेको छ भने खुद फि तथा कमिसन आम्दानी २३.६८ प्रतिशतले घटेको छ ।
त्यस्तै, लघुवित्तको निष्क्रिय कर्जा समीक्षा अवधिमा ४.९१ प्रतिशतबाट घटेर ४.६१ प्रतिशत र इम्पेरमेन्ट चार्ज २ करोड २९ लाख रुपियाँबाट घटेर १७ लाखमा सीमित भएको छ । त्यसैगरी, सञ्चालन मुनाफा भने ७३.७२ प्रतिशत बढेको छ ।
नाफासँगै लघुवित्तको प्रतिशेयर आम्दानी पनि बढेको देखिएको छ । तेस्रो त्रैमाससम्ममा लघुवित्तको यस्तो आम्दानी २.२ रुपियाँले बढेर ४.७५ रुपियाँ पुगेको छ । त्यस्तै, मूल्य आम्दानी अनुपात १५२.५८ गुणा, प्रतिशेयर नेटवर्थ १२६.४६ गुणा र वितरणयोग्य मुनाफा ६२ लाख रुपियाँ रहेको छ भने वितरणयोग्य प्रतिशेयर आम्दानी २.५९ रुपियाँ रहेको छ ।
३१ करोड ९८ लाख रुपियाँ चुक्ता पुँजी रहेको यस लघुवित्तको जगेडा कोषमा १५ करोड ४ लाख रुपियाँ सञ्चित छ । चैत मसान्तसम्ममा संस्थाले ४ अर्ब १५ करोड रुपियाँ निक्षेप तथा सापटीबाट ४ अर्ब ९ करोड रुपियाँ कर्जा लगानी गरेको वित्तीय विवरणमा उल्लेख छ ।
