नेपाल भित्रियो ‘कम्ब्याट तेक्वान्दो’

काठमाडौं । विश्वका ११० देशमा सञ्चालन भइरहेको कम्ब्याट तेक्वान्दो नेपालमा पनि सुरु हुने भएको छ । सन् २०२३ देखि अमेरिकाबाट सुरु भएको कम्ब्याट तेक्वान्दो नेपालमा समेत व्यवसायीकरुपमा सञ्चालन हुने भएको हो ।

कम्ब्याट तेक्वान्दोले आज काठमाडौंमा एक कार्यक्रमको आयोजना गर्दै नेपालमा व्यवसायीक सुरुवातको औपचारिक घोषणा गरेको छ । कम्ब्याट तेक्वान्दोमा ११० मुलुकका ११५ मिलियन तेक्वान्दो खेलाडी र ४ हजारभन्दा बढी व्यवसायीक रेफ्री संलग्न छन् । यससँगै, अब नेपालमा समेत तेक्वान्दोको व्यवसायीक खेल प्रतियोगिता हुनेछ ।

‘नेपालमा थुप्रै सम्भावना भएका तेक्वान्दो खेलाडी छन्,’ शिनले भने, ‘यही सम्भावनालाई उजागर गर्ने लक्ष्यसहित कम्ब्याट तेक्वान्दोको व्यवसायीक खेल नेपालमा पनि सुरु गर्न लागेका हौं ।’

विश्वव्यापी रुपमा तेक्वान्दोको २० बिलियन अमेरिकी डलरको बजार भएको आँकलन छ । यही बजारलाई मध्यनजर गर्दै गत वर्षदेखि सुरु भएको कम्ब्याट तेक्वान्दो नेपालमा पनि सुरु गरेको आयोजकले जानकारी दिएको छ । कार्यक्रममा बोल्दै कम्ब्याट तेक्वान्दो नेपालका अध्यक्ष तथा राष्ट्रिय तेक्वान्दो संघ नेपालका वरिष्ठ उपाध्यक्ष एकनाथ थापाले औपचारिक सुरुवातको घोषणापछि अब छिट्टै व्यवसायीकरुपमा तेक्वान्दोको प्रतिस्पर्धा सुरु गर्ने बताए ।

उनले भने, ‘हामि छिट्टै कम्ब्याट तेक्वान्दोको प्रतियोगिता सुरु गर्नेछौं । सुरुमा जुनियरहरुको खेल हुनेछ । त्यसपछि सिनियर्सको खेल हुनेछ ।’ उनले यस प्रकारको प्रतियोगिताले नेपालका खेलाडीले विश्वस्तरको ‘एक्सपोजर’ पाउने र राम्रो आर्थिक लाभ समेत हुने बताए ।

यस्तै राष्ट्रिय तेक्वान्दो संघ नेपालका महासचिव राकेशकुमार राईले नेपालमा कम्ब्याट तेक्वान्दो आउँदा आफूहरु उत्साहि बनेको बताए । यसबाट नेपालमा तेक्वान्दाको व्यवसायीक खेल औपचारिकरुपमा सुरु हुने भएकाले सक्दो सहयोग गर्ने प्रतिबद्धा जनाए । नेपालमा १ हजार ५०० भन्दा बढी तेक्वान्दो प्रशिक्षण एकेडेमी छन् । तर व्यवसायीक लिगको अभावमा एकेडेमी र खेलाडीले एक्सपोजर पाउन सकेका छैनन् ।

‘यसप्रकारको लिगले नेपालका खेलाडीलाई एक्सपोज गर्न सहज बनाउँछ,’ राईले भने, ‘विश्वभरका खेलाडीसँग खेल्न पाउँदा नेपालका खेलाडीले विभिन्न उपलिब्ध हासिल गर्न सक्छन् ।’

कम्ब्याट तेक्वान्दोमा नेपालका खेलाडीले विदेशबाट प्रतिस्पर्धाका लागि आउने व्यवसायीक तेक्वान्दो खेलाडीसँग भिड्नुपर्ने हुन्छ । जसबाट खेलाडीले एक्सपोजर पाउने निश्चित छ ।
यस्तै यसप्रकारको व्यवसायीक खेल नेपालमा पनि सञ्चालन हुनुले नयाँ खेलाडीलाई प्रोत्साहन पुग्ने अन्तर्राष्ट्रिय स्कुल महासंघ (आईएसएफ)का कार्यकारी सदस्य राजकुमार कार्की बताए । उनका अनुसार स्कुले विद्यार्थीलाई समेत तेक्वान्दोमा लाग्नका लागि कम्ब्याट तेक्वान्दोबाट प्रेरणा मिल्नेछ ।

यसले नेपालमा खेलकुद पर्यटनको सम्भावनालाई उजागर गर्दै खेलाडीलाई स्वदेशमा राम्रो कमाई गर्ने अवसर सिर्जना गर्ने आयोजकको दाबी छ । नेपालमा प्रमुख समस्याकारुपमा रहेको खेलाडी पयालयनको सिलसिलालाई समेत केही हदसम्म रोक्न मद्दत गर्ने बताइएको छ ।

यसैगरी ईएसपीएन र डिज्ने प्ल्सजस्ता अन्तर्राष्ट्रिय सञ्चारमाध्यमबाट प्रसारण हुने यो कार्यक्रमले नेपालको सुन्दरता, संस्कृती र खेल पर्यटनलाई विश्वमाज उजागर गर्दै पर्यटन प्रबद्र्धनमा सहयोगी भूमिका खेल्ने विश्वास लिइएको छ ।