बिहीबार ३ असोज, २०८१ | Thursday Sep 19, 2024
काठमाडौं । नेपाल आउन लागेका यात्रुहरु तीन दिनदेखि दुबई विमानस्थलमा बिचल्लीमा परेका छन् ।
विमानस्थलमा यसरी जहाजको पखाइमा रहँदा र उडान समयमा नहुँर्दा छुट्टी मनाउन आउन लागेका नेपालीहरुको बिचल्ली भएको हो । साथै काठमाडौं आएर विभिन्न गन्तव्यमा जान काटेको हवाई टिकट पनि रद्द भएको पीडित यात्रुहरुको गुनासो छ ।
दुबई विमानस्थलमै जहाजको पखाइमा रहेका एक यात्रुले भने, हामी तीन दिनदेखि विमानस्थलमै जहाजको पर्खाइमा छौं । दशैं छुट्टी लिएको पनि तीन त विमानस्थल मै बित्यो । काठमाडौंबाट विराटनगर घर परिवारसँग दशैं मनाउन काटेको हवाई टिकट पनि रद्द भइसकेको छ ।’
‘हामीले नेपालकै जहाजमा नेपाल जाउ भन्दा पनि यसरी दुःख पाउनु परेको छ । यसरी दुःख पाउँदा पनि नेपाल सरकारले किन नेपाल एयरलाइन्सलाई प्रश्न गर्दैन ?’ उनले भने ।
उनका अनुसार विमानस्थलमा शनिबारदेखि सोमबार सम्म करिब डेड सय यात्रुहरु जहाजको पर्खाइमा छन् । शनिबार उडनु पर्ने जहाज त्यो पनि रद्द भयो, आइतबारको उडान पनि रद्द र सोमबारको उडान पनि रद्द हुँदा यात्रुहरु मारमा परेका उनको भनाइ छ ।
विदेश जाँदा पनि दुःख नेपाल आउन पनि त्यतिकै दुःख–उनले सुनाए ।
नेपाल एयरलाइन्सका एक अधिकारीका अनुसार हिजो राति साढे ११ बजे उडान गर्नुपर्ने वाइडबडी जहाज आज बिहान साढे ६ बजे काठमाडौंबाट दुबई उडेको छ । आज बिहानको न्यारोबडी जहाजमा एक सय ५८ जना यात्रु काठमाडौं आइपुगेको ती अधिकारी जानकारी दिए ।
नेपाल वायुसेवा निगमका प्रवक्ता रमेश पौडेलका अनुसार जहाजमा केही प्राविधिक समस्याका कारण उडान रद्द गर्नु परेको हो । हाल त्यो समस्या हल भएर यात्रुहरु लिएर जहाज काठमाडौं आउने उनले बताए ।
