काठमाडौंः नेपाल मेडिकल काउन्सिलले बिरामीको देब्रे घुँडाको अपरेशन (शल्यक्रिया) गर्नुपर्नेमा दाँया घुँडाको अपरेशन गर्ने नर्भिक हस्पिटलका दुवै जना डाक्टरलाई निलम्बन गर्ने निर्णय गरेको छ ।
डाक्टरद्धय प्रविण नेपाल र शैलेस सिटौलालाई मेडिकल प्राक्टिस गर्न नपाउने गरी एक महिना निलम्बनमा राख्ने निर्णय गरेको हो । काउन्सिलको गएको यही फागुन २३ बसेको पूर्ण बैठकले यस्तो निर्णय गरेको हो ।
नर्भिक अस्पतालमा कार्यरत डाक्टरद्धय नेपाल र रन्जितकारको टोलीले गत ११ फागुनमा बायाँ घुडाको शल्यक्रिया गर्न आएकी चितवनकी बिन्दु पौडेलको देब्रेको सट्टा दाइने घुँडाको अप्रेशन गरेका थिए ।
सो घटना सार्वजनिक भए लगत्तै काउन्सिलले प्रारम्भिक छानवीन गरि निलम्बनको निर्णय लिएको हो । काउन्सिलका प्रवक्ता डा. कृष्ण अधिकारी भन्छन, ‘हामीलाई कसैले उजुरी गरेको थिएन । तर घटना गम्भीर देखेपछि हामी आफैले छानवीन अघि बढायौँ र यस्तो निर्णय लिएका हौँ ।’
उनले यस घटनामा छानवीन अझै नसकिएको र पछि ठहरेबमोजिम हुने गरी अहिलेलाई मेडिकल प्राक्टिस गर्न नपाउने गरी दुवै डाक्टरलाई एक महिनाको लागि निलम्बित गरिएको जानकारी दिए ।
