काठमाडौंः नेशनल लाइफ इन्स्योरेन्स कम्पनीले मंगलबार ९९ लाख ३६ हजार चार सय ७० कित्ता हकप्रद शेयर खुल्ला गरेको छ । यो बीमा कम्पनीले ९९ करोड ३६ लाख ४७ हजार रुपियाँ बराबरको हकप्रद निष्काशन गरेको हो ।
हकप्रदका लागि आवेदन गर्न साउन १ देखि भदौ ४ गतेभित्र दिनुपर्ने समय सीमा तोकिएको छ । बीमा कम्पनीले एक अर्ब ६५ करोड ६० लाख ७९ हजार पाँच सय ९० रुपियाँ चुक्तापूँजी बढाउन हकप्रद निष्काशन गरेको हो । हकप्रद बाँडफाँडपछि कम्पनीको चुक्तापूँजी दुई अर्ब ६४ करोड ९७ लाख रुपियाँ पुग्ने कम्पनीले जनाएको छ ।
कम्पनीले १० कित्ता शेयर बराबर नयाँ ६ कित्ताको अनुपातमा हकप्रद वितरण गर्न लागेको हो । हकप्रद शेयरको लागि यही असार २१ गतेसम्म कायम रहेका शेयरधनीले आवेदन दिन पाउने छन् ।
कम्पनीले धितोपत्र निष्काशन तथा बिक्री प्रवन्धकमा एनआईबिएल एस क्यापिटललाई नियुक्त गरेको छ । कम्पनीमा संस्थापक सेयरधनी नेपालीको ४५, विदेशी संस्थापकको १०, सर्वसाधारणको ३५ र राष्ट्रिय वाणिज्य बैंकको १० प्रतिशत स्वामित्व रहेको छ ।
