महिलाले उत्पादन गरेका सामानहरुको प्रवर्द्धन गर्दै महिला उद्यमी सोनी जोशी

काठमाडौं । सोनी जोशी महिला उद्यमी हुन्, जसले लामो समयदेखि साना महिला उद्यमीहरुले तयार गरेका धातु तथ छालाका सामानहरु किनेर बिक्री गर्दै आएकी छन् । उनको कम्पनी न्यानो ह्याण्डिक्राफ्ट प्रालीले यो काम गर्दै आएको छ । जोशीले १५ बर्षदेखि हिराको पनि व्यापार गर्दैआएकी छन् । 

आफू पनि रोजगार हुने गरी साना तथा घरेलु उद्यम सञ्चालन गरी सामान उत्पादन गर्ने महिलाहरुलाई आफूले बनाएका सामानहरु बिक्री गर्न बजारको समस्या नहोस भनेर आफूले सामान किन्ने र थोरै नाफा राखेर बिक्री गरिदिने काम उनले गर्दै आएकी छन् । 

नेपाल उद्योग परिसंघले राजधानीमा आयोजना गरेको महिलाहरुद्धारा उत्पादित सामग्रीहरुको प्रदर्शनीमा जोशीको कम्पनीले पनि सहभागिता जनाएको थियो । विगत आठ वर्षदेखि महिलाको सीप विकासका लागि क्रियाशील रहँदै आएकी उनले यस व्यवसायमा २० लाख रुपियाँ लगानी गरेकी छन्, जसबाठ उनलाई मासिक करिव ६० हजार रुपियाँ नाफा हुने गरेको छ । 

व्यवसाय सुरु गर्दाताका निकै कठिनाई हुने गरे पनि अहिले त्यो स्थिति नरहेको सुनाउँदै जोशीले भनिन्, ‘उत्पादन भएका सामग्री देशभित्रै बिक्री गर्ने कठिनाई भएपछि महिला व्यवसायले कसरी जीवनयापन गर्ने ? कसरी उनीहरुको कला र सीपको संरक्षण र विकास हुन्छ ? भत्तmपुरका महिलाले घरमै धातुका भाँडाकुँडा, थाल, पाथी निर्माण गर्ने, रंगरोगन गर्ने, बुट्टा कोर्ने काम गर्छन् । त्यसलाई हामीले संरक्षण र प्रवर्द्धन गर्दै आएका छौं ।’

कोरोना महामारीअघि चीन, रुस, पोल्याण्ड जस्ता देशमा धातुका सामग्रीहरुको प्रर्दशनी गर्दै आएको सुनाउँदै जोशीले नेपाली सामानको प्रर्दशनी देख्दा विदेशीले पनि राम्रो प्रतिक्रिया जनाउने गरेको सुनाइन् । महिला उद्यमी महासंघलगायतका संस्थाले पनि यस्ता प्रदर्शनीहरु आयोजना गर्ने गरेबाट नेपाली हस्तकला र शिल्पकलाका सामानहरुले बजार राम्रो पाउने गरेको उनको भनाई छ ।