‘स्वर्गीय बाबु छिरी शेर्पा स्मारक ओपन स्पोर्ट क्लाइम्बिङ’ प्रतियोगिता हुँदै

काठमाडौं । ‘स्वर्गीय बाबु छिरी शेर्पा स्मारक ओपन स्पोर्ट्स क्लाइम्बिङ’ प्रतियोगिता हुने भएको छ । बौद्धस्थित क्रिम्पान्जी एडभेन्चर हबमा आज (बिहीबार) पत्रकार सम्मेलन गर्दै यही चैत १ गते प्रतियोगिताको आयोजना हुन गइरहेको पर्वतीय खेलकुद संघका अध्यक्ष ङवाङ नीमा शेर्पाले जानकारी दिए । 

पर्वतीय खेलकुद संघ र सगरमाथा आरोही संघले संयुक्त रूपमा आयोजना गर्ने कार्यक्रमको बारेमा अध्यक्ष शेर्पाले जानकारी गराएका थिए । 'यसको माध्यमबाट साहसिक खेलकुद उद्योगमा सकारात्मक प्रभाव पार्ने तथा सहभागीहरूका कारण नेपालमा खेलकुद आरोहण विकासको अनुभव बढाउने लक्ष्य राखेका छौं,' अध्यक्ष शेर्पाले बताए । 

कार्यक्रममा सगरमाथा आरोही संघकी अध्यक्ष माया शेर्पाले ‘स्वर्गीय बाबु छिरी शेर्पा’ विश्व कीर्तिमानी आरोही भएको र उनको योगदान स्मरणीय हुनुपर्ने बताइन् । ‘कीर्तिमानी आरोहीलाई बिर्सने क्रम बढेकाले स्मरण योग्य बनाउन हालसम्म प्रतियोगिता पनि नभएको हुनाले उनको सम्झनामा गर्न लागिएको हो,’ संघकी अध्यक्ष शेर्पाले बताइन् ।

प्रतियोगिता हरेक वर्ष निरन्तर रुपमा आयोजना गर्ने बताइन् । ‘बाबु छिरी शेर्पाको सालिक र संग्रहालय बनाउन संघका पूर्व अध्यक्ष लगायतको योगदान भएकोले हालसम्म संघले नै रेखदेख गर्दै आइरहेको छ,' उनले थपिन्।

यस प्रतियोगीतालाई नेपाल राष्ट्रिय पर्वतारोहण पथ प्रदर्शक संघले प्राविधिक सहयोग (रुट सेटिङ, जजिङ, सुरक्षा, र बेले सर्भिस) प्रदान गर्ने भएको छ । उक्त प्रतियोगिता पुरुष र महिलाबीच छुट्टाछुट्टै आयोजना हुनेछ । प्रतियोगितामा पहिलो, दोस्रो र तेस्रो हुनेलाई क्रमशः नगद पुरस्कार ५० हजार, ३० हजार र १५ हजार प्रदान गरिने छ ।

स्व.बाबु छिरी शेर्पालाई अहिलेसम्मकै महान् पर्वतारोही मानिन्छ । १०औं पटक सगरमाथा शिखर चुमेका (चार पटक चीन तर्फबाट सहित)  शेर्पा हिमालका सबैभन्दा बलिया आरोही एवं विश्वका प्रशिद्ध पर्वतारोहीका रूपमा चिनिन्छन् ।

वसन्त ऋतृमा अक्सिजन बिना सगरमाथा शिखरमा २१ घण्टा भन्दा बढी समय बिताए (अझै पनि रेकर्ड कार्यम नै रहेको) र १६ घण्टा ५६ मिनेटमा दक्षिण तर्फबाट सगरमाथा छिटो आरोहण गरी उनले सगरमाथामा दुई विश्व कीर्तिमान राख्न सफल भएका थिए । सन् २००१ अप्रिल २९ तारिखका दिन सगरमाथा ११ औं पटक आरोहण गर्ने प्रयास गर्दा उनको निधन भएको थियो ।