सोमबार ७ असोज, २०८१ | Monday Sep 23, 2024
काठमाडौं । साताको पहिलो दिन आज शेयर बजारमा उछाल आएको छ । नेप्से उचालिएसँगै कारोबार रकम पनि ५ अर्ब नाघेको छ ।
नेपाल राष्ट्र बैंकले शुक्रबार मौद्रिक नीतिको तेस्रो त्रैमासको समीक्षामा लचिलो नीति लिएपछि त्यसको प्रभाव शेयर बजारमा पनि देखिएको छ ।
नेपाल स्टक इक्सचेञ्ज लिमिटेड (नेप्से) का अनुसार आज बजार ४५.६९ अंकले बढेको हो । २.२६ प्रतिशत बजार बढेसँगै नेप्से परिसूचक २०६४.४५ अंकमा उक्लिएको छ ।
आज ३२३ कम्पनीका १ करोड २२ लाख ४० हजार कित्ता शेयर किनबेच हुँदा ५ अर्ब २५ करोड १० लाख रुपियाँ बराबरको कारोबार भएको हो ।
आत्मनिर्भर लघुवित्त, सबैको लघुवित्त, सामुदायिक लघुवित्त र नेरुडे मिर्मिरे लघुवित्तको शेयर सकारात्मक सर्किट लेभलमा कारोबार भएको छ ।
त्यस्तै माण्डु हाइड्रोपावरको शेयर भने यस दिन नकारात्मक सर्किट लेभलमा कारोबार भएको छ ।
आज सिईडीबी हाइड्रोपावरको उच्च कारोबार भएको छ । उक्त कम्पनीको १४ करोड ८० लाख रुपिायँ बराबरको शेयर किनबेच भएको नेप्सेले जनाएको छ ।
