आइतबार १८ कात्तिक, २०८१ | Sunday Nov 03, 2024
काठमाडौं । क्रिएशन नेपालसँगको सहकार्यमा १२ विद्यालयले आज आफ्ना विद्यालयमा वेस्ट स्मार्ट क्लब (डब्लुएससी) स्थापना गर्न लागेका छन् । बागमति र मधेश प्रदेशका ६ स्थानीय तहका १२ विद्यालयहरुले वेस्ट स्मार्ट क्लब स्थापना गर्न लागिएको हो ।
वेस्ट स्मार्ट क्लबका लागि छनौट भएका विद्यालयका शिक्षक, शिक्षिका तथा विद्यार्थीहरुलाई क्रिएसन नेपालद्धारा सञ्चालिन क्याप परियोजना (नेपालका नदीहरूमा प्लास्टिक चुहावट रोक्न साझा दृष्टिकोण) अन्तर्गत दुई दिवसीय अन्तरक्रियात्मक प्रशिक्षण र कार्यशाला आज काठमाडौंमा सम्पन्न भएको हो ।
सहभागीहरूलाई वेस्ट स्मार्ट क्लब इनिसिएटिभको महत्व र यसले कसरी फोहोर व्यवस्थापन र तल्लो तहमा प्लाष्टिक प्रदुषण नियन्त्रणका लागि उचित मार्गदर्शनका साथ युवाहरुको सोचलाई रूपान्तरण गर्न निर्णायक भूमिका खेल्न सक्छ भन्ने बारेमा प्रशिक्षण दिइएको थियो ।
ललितपुर महानगरपालिका, भरतपुर उपमहागरपालिका, गजुरी गाँउपालिका, इच्छाकामना गाउँपालिका, बर्दिवास नगरपालिका र गोलान्जोर गाँउपालिकाका दश विद्यालयबाट आठ शिक्षक र दुई जना शिक्षिका गरी जम्मा दश जना, प्रत्येक विद्यालयबाट २–२ जना विद्यार्थीहरुगरी जम्मा २० जनालाई प्लास्टिकजन्य फोहोरमैला व्यवस्थापनबारे प्रशिक्षण दिइएको परियोजनाका लिड उज्ज्वल उपाध्यायले बताए ।
सहभागीहरुले आ आफनो समुदाय र विद्यालयमा गएर अन्य विद्यार्थीहरुलाई सिकेका ज्ञानलार्य साझा गर्दै प्लास्टिकजन्य फोहोरमैला विरुद्ध अभियान र जनचेतना फैलाउने काम गर्ने परियोजना लिड उपाध्यायले विश्वास व्यक्त गरे ।
प्रशिक्षणमा सहभागी भएका एक शिक्षकहरुले प्लाष्टिक प्रदुषण नियन्त्रणका लागि आ आफ्नो विद्यालयमा ज्ञान सिकाउन र विस्तार गर्न कार्यशाला निकै फलदायी सावित हुने बताए । प्रत्येक विद्यालयमा कक्षा ५ देखि ९ सम्मका ११ जना बालबालिका प्लाष्टिक प्रदुषण सम्बन्धी सामुदायिक चेतना अभिवृद्धि गर्न आयोजनाको आवश्यकता अनुसार सात नगरपालिकाबाट १२ वटा विद्यालय छनोट गरी डब्लुएससी स्थापना गरिने प्रोजेक्ट क्यापका प्रमुख उज्ज्वल उपाध्यायले जानकारी दिए ।
क्रिएसन नेपालले परियोजना अन्तर्गत छनौट भएका प्रत्येक विद्यालयहरूमा वेस्ट स्मार्ट क्लबहरू स्थापना गर्नका लागि एक लाख पाँचहजारको बराबरको आर्थिक सहयोग प्रदान गर्नेछ । क्रिएशनको एक बेसलाइन प्रतिवेदनअनुसार नेपालमा निजी तथा सरकारी शैक्षिक संस्थाहरुबाट वार्षिक २१।४ प्रतिशत प्लास्टिकजन्य फोहोरमैला उत्पादन हुने गरेको छ ।
