बजेट चाँडो पारित गर्न व्यवसायीद्वारा पर्यटन बोर्डको ध्यानाकर्षण

काठमाडौँ ।  नेपाल पर्यटन बोर्डको बजेट चाँडो पारितगरी अन्तर्राष्ट्रिय पर्यटन मेलामा निजी क्षेत्रको सहभागिता सुनिश्चितता गरिनुपर्नेलगायत माग राख्दै नेपाल राष्ट्रिय पर्यटन व्यवसायी सङ्गठनले बोर्डको ध्यानाकर्षण गराएको छ ।

सङ्गठनका कार्यवाहक अध्यक्ष राजेन्द्रप्रसाद सापकोटा नेतृत्वको सङ्गठनको टोली बुधबार बोर्डका प्रमुख कार्यकारी अधिकृत (सिइओ) दीपकराज जोशीलाई भेटी बोर्डमार्फत सम्बोधन हुनुपर्ने विभिन्न विषय ध्यानाकर्षण गराएको हो । साथै सङ्गठनले सिइओ जोशीलाई बधाई तथा कार्यकालको शुभकामना व्यक्त गरेको छ ।

बोर्डले प्राथमिकताका साथ गर्नुपर्ने बुँदागत काम कार्यान्वयनका लागि बोर्डको ध्यानाकर्षण गराइएको सङ्गठनका कार्यवाहक अध्यक्ष सापकोटाले बताए । सङ्गठनले बोर्डको बजेट कार्यान्वयन, विश्वप्रसिद्ध पर्यटन मेलामा बोर्डमार्फत निजी क्षेत्रको सहभागिता, नयाँ पर्यटन बजारको पहिचान र प्रवर्द्धन तथा हवाई टिकट र पदयात्रामा लगाइएको कर हटाउन माग गरेको छ ।

यस्तै पदयात्री सूचना व्यवस्थापन प्रणाली (टिम्स) को प्रभावकारी व्यवस्थापन, ‘नो ट्रेकिङ विदआउट गाइड–पोर्ट’ यथाशीघ्र लागू गर्नुपर्ने, विश्वबजारमा नेपालको प्रचारप्रसार गर्न बिबिसी, सिएनएनजस्ता प्रसिद्ध सञ्चारमाध्यममा नेपालको प्रचार गरिनुपर्ने, श्रमिक कल्याणकारी कोष कार्यान्वयन र नेपाल वायुसेवा निगम (नेपाल एयरलाइन्स) को सुधारका लागि पर्यटन बोर्डले नेतृत्वदायी भूमिका खेल्नुपर्नेलगायत माग रहेका छन् ।