शुक्रबार १६ कात्तिक, २०८१ | Friday Nov 01, 2024
काठमाडौं । हिमालयन बैंकको खुद नाफा ७२ करोड ६४ लाख रुपियाँमा सीमित भएको छ । बैंकले प्रकाशित गरेको चालू आवको पहिलो त्रैमास अर्थात् असोज मसान्तसम्मको अपरिष्कृत वित्तीय विवरणअनुसार यस्तो देखिएको छ ।
गत आवको सोही अवधिमा बैंकले १ अर्ब ५ करोड ६१ लाख रुपियाँ नाफा कमाएको थियो । गत आवको तुलनामा यो ३१.२२ प्रतिशतले कम हो ।
खुद ब्याज आम्दानी प्रभावित हुँदा यसको नाफा घटेकोे हो । समीक्षा अवधिमा बैंकले २ अर्ब ४५ करोड रुपियाँ खुद ब्याज आम्दानी गरेको छ, जुन गत आवको तुलनामा २२.८८ प्रतिशतले कम हो । गत आवको सोही अवधिमा बैंकको यस्तो आम्दानी ३ अर्ब १७ करोड रुपियाँ थियो ।
पहिलो त्रैमाससम्म बैंकको सञ्चालन नाफा भने २०.२२ प्रतिशतले बढेर १ अर्ब ८१ करोड, खराब कर्जा ४.६७ प्रतिशतबाट बढेर ४.९८ प्रतिशत पुगेको छ भने वितरणयोग्य नाफा भने ३ अर्ब ४८ करोड रुपियाँ ऋणात्मक छ ।
नाफा घटेसँगै प्रतिशेयर आम्दानी पनि प्रभावित बनेको छ । समीक्षा अवधिमा बैंकको प्रतिशेयर आम्दानी ६.०९ रुपियाँले घटेर १३.४२ रुपियाँमा सीमित भएको छ । त्यस्तै, प्रतिशेयर नेटवर्थ १७९.६८ रुपियाँ रहेको छ ।
२१ अर्ब ६५ करोड रुपियाँ चुक्ता पुँजी रहेको बैंकको जगेडा कोषमा २० अर्ब ७४ करोड रुपियाँ छ ।
