काठमाडौंः शहरी विकास मन्त्री मोहम्मद इस्तियाक राईले एकीकृत शहरी विकास गर्न देशका १५० नगरपालिकामा एकीकृत शहरी योजना कार्यान्वयनमा ल्याउन लागेको जानकारी दिएका छन् । प्रतिनिधिसभाको बुधबारको बैठकमा विनियोजन विधेयकमाथिको छलफलमा सांसदले उठाएको प्रश्नको जवाफ दिँदै उनले उक्त कुरा बताएका हुन ।
मन्त्री राईले शहरलाई मेघा सिटी, स्मार्ट सिटी विकसित गर्न लागिएको जानकारी दिँदै संघीय संसद् भवन निर्माण कार्य अगाडि बढेको बताए । उनले शहरी विकास तथा आवास निर्माण गर्न रकम विनियोजन गर्दा भेदभाव नगरिएको पनि दावी गरे ।
विपन्न समुदायलाई आवास निर्माण गर्दा सरकारले सुविधा दिने राईको भनाई छ । उनले काठमाडौँ उपत्यकामा रहेका नदी सरसफाइ गर्न अभियान जारी रहेको बताए । घरबाट सिधै नदीमा ढल मिसाउने कार्य कडाइका साथ नियन्त्रण गर्ने राईको भनाई छ ।
भवन आचारसंहिता पूर्णरुपमा कार्यान्वयन गर्न, सबै पालिकामा भवनसंहिता कार्यान्वयन गराउन उनीहरुको क्षमता बढाइएको भन्दै उनले जनता आवास कार्यक्रम प्रदेश तहबाट सञ्चालन गर्न रकम विनियोजन भएको बताए ।
मन्त्री राईको सो जवाफमाथि पूरक प्रश्न गर्दै सांसद प्रेम सुवालले प्रत्येक जिल्लाका जिल्ला सदरमुकामलाई सुविधा सम्पन्न गराउन के योजना छ भनी प्रश्न गरे ? सांसद सरिता गिरीले शहरी विकास कार्यक्रम नयाँ नगरपालिका पनि कार्यान्वयनमा ल्याउन माग गरिन ।
सांसद दिव्यमणि राजभण्डारीले भूकम्पपीडित जनतालाई थप राहत दिन माग गरे भने राजकिशोर यादवले प्रदेश नं २ का शहर स्मार्ट, मेघा सिटी बनाउन माग गरे ।
सांसदहरुको प्रश्नको जवाफ दिँदै मन्त्री राईले सांसद आवास निर्माण कार्य अगाडि बढाइने, सिराह जिल्लामा बजेट यथेष्ट विनियोजन भएको बताए ।
