काठमाडौँ । उखु किसानहरुले दिपावली र छठ पर्व मनाउन पैसा पाउने भएका छन् । रौतहटका किसानहरुले श्रीराम सुगर मिल्सबाट रु. ४१ करोड भुक्तानी पाउन बाँकी छ ।
उखु किसानहरुको समस्या समाधान बारे प्रतिनिधि सभा अन्तरगत उद्योग तथा वाणिज्य र श्रम तथा उपभोक्ता हित समितिमा आज भएको छलफल पछि रौतहटका उखु किसानहरुलाई पर्व मनाउन केही पैसा उपलब्ध गराउन निर्देशन दिएको हो । साथै १ महिना भित्रै श्रीराम सुगर मिल्सबाट पाउनु पर्ने सबै बक्यौता उपलब्ध गराउने व्यवस्था मिलाउन समिति सभापति बिमलकुमार श्रीवास्तवले निर्देशन दिए ।
उक्त छलफलमा उद्योग मन्त्री लेखराज भट्टको पनि उपस्थिति थियो । सो अवसरमा मन्त्री भट्टले किसानहरुको समस्या तत्कालै समाधान गर्नु पर्नेमा सरकार गम्भीर रहेको बताए । साथै चिनी उद्योगहरुको संरक्षणका लागि के गर्न सकिन्छ भन्नेमा पनि सरकार उत्तिकै गम्भीर रहेको उनको भनाई थियो ।
रौतहटका उखु किसानले श्रीराम सुगर मिल्सबाट तत्काल पाउनु पर्ने बक्यौता रकम रु. ४१ करोड दशैँ पहिले नै पाउनु पर्ने माग गर्दै आएका थिए । उखु उत्पादक संघले उद्योगमा कार्यरत श्रमिक तथा कर्मचारीले ५ महिनाको तलब÷भत्ता तथा डेढ वर्षको सञ्चककोष समेत गरी रु. ४ करोड पाउन बाँकी रहेकाले त्यसको पनि भुक्तानी दिन माग गर्दै आइको वरिष्ठ उपाध्यक्ष रामप्रमोदप्रसाद यादवले जनाएका छन् ।
उखु उत्पादक किसान र कर्मचारीहरुले करोडौँ रुपियाँ भुक्तानी पाउन बाँकी रहेकै अवस्थामा गत साउनमा उद्योग व्यवस्थापनले कम्पनी बन्द गर्ने निर्णय गरेको छ । उद्योग बन्द हुँदा ३३० स्थायी श्रमिक÷कर्मचारी र करीब साँढे २ सय करारका गरी झण्डै ६०० जना बेरोजगार बनेका छन् । संघले उद्योग बन्द हैन सञ्चालनको माग पनि गर्दै उपाध्यक्ष यादवले बताए ।