आइतबार २ मंसिर, २०८१ | Sunday Nov 17, 2024
आइतबार २ मंसिर, २०८१ | Sunday Nov 17, 2024
काठमाडौँ । यती एअरलाइन्सले अब भाइबरबाट पनि आफ्नो टिकट किन्न सकिने सुविधा मिलाएको छ । भाइबरमा ‘५–वटा–१० अर्थात् १०१०१०१०१०’ हटलाइन नम्बरमा म्यासेज गरेर टिकट लिन सकिने सुविधा कम्पनीले सुरु गरेको हो ।
यती एयरलाइन्सका प्रवक्ता सुदर्शन बर्तौलालका अनुसार भाइबर नेपालसँगको सहकार्यमा यात्रुलाई सहज तरिकाले टिकट उपलब्ध गराउने उद्देश्यले ‘भर्चुअल सेल्स काउन्टर’ को व्यवस्था गरी यो सेवा २०७९ असार १६ गतेबाट सुरू हुनेछ ।
उनले भने, ‘हाम्रो भर्चुअल काउन्टर बिहान ७ बजेदेखि बेलुका ७ बजेसम्म १२ घण्टा खुल्ला रहने छ, सो समयभित्र यात्रुहरुले ‘५–वटा–१०’ भाइबर नम्बरमा मेसेज पठाई आफूलाई आवश्यक परेको टिकटको लागि अनुरोध गर्न सक्नुहुनेछ ।’
त्यस्तै, टिकटको भुक्तानी क्यूआर कोडमार्फत् सजिलैसँग गरी टिकट लिन सकिन्छ । यात्रुहरुलाई टिकट काट्न थप सहज बनाउने उद्देश्यले यो सेवा सुरु गरिएको कम्पनीको भनाई छ । यती एअरलाइन्सको टिकट मोबाइल एप, वेभसाइट, सेल्स काउन्टर, ट्राभल एजेन्सी, ई–सेवा र खल्तीमार्फत् उपलब्ध हुँदै आएकोमा भाइबर सेवा पनि थपिएको हो ।
बर्तौलाले यात्रुहरुले सकेसम्म छिटो र सरल तरिकाले यती एअरलाइन्सको टिकट भाइबरबाट लिन सकुन भनेर यो सेवा सुरु गरेको बताउँदै हाललाई सो सेवामा म्यासेज मात्र पठाउन मिल्ने गरी सुरु गरिएको, केही समयपश्चात् कल पनि गर्न मिल्ने व्यवस्था मिलाउने बताए ।
