बजेटमा आयव्ययको अनुमान यथार्थपरक ढंगले गर्ननसक्ने अर्थमन्त्रीलाई अर्थ समितिले बोलाउने

काठमाडौं । संसदको अर्थ समितिले उपसमिति बनाएर मुख्य–मुख्य भन्सार कार्यालयहरूको अनुगमन गर्ने भएको छ । बिहीवार बसेको समितिले भन्सार गतिविधि हेर्नेगरी उपसमिति बनाएर अनुगमन गर्ने भएको हो । 

बिहीबारको बैठकमा बोल्दै समितिका सभापति सन्तोष चालिसेले भन्सार नाकाहरुमा चोरी पैठारी वृद्धि भएको धेरै गुनासो आएकाले चोरी पैठारी नियन्त्रण गर्ने र भन्सार कार्यालयहरुको अनुगमन गर्ने निर्णय गरेको बताए । 

आगामी बैठकमा अर्थमन्त्रीसँग यस विषयमा छलफल गर्नुपर्ने आवश्यकता देखिएको चालिसेले बताए । उनले सरकारले आयव्यय अनुमान गर्ने विद्यामान पद्धतिमा कमी कमजोरी र प्रक्षेपणअनुसार राजश्व संकलन नभई लक्ष्य उल्लेख्य रुपमा घटाउनुको कारण, संशोधित लक्ष्यअनुसार राजश्व संकलन गर्ने अर्थ मन्त्रालयको रणनीति र कार्ययोजना बारेमा मन्त्रीसँग छलफल गर्ने बताए । 

सभापति चालिसेले मुलुकमा रहेको अन्तर्राष्ट्रिय भन्सारको विषयमा समितिले समय मिलाएर छलफल गर्ने निर्णय गरिएको बताए । उनले भने, ‘आर्थिक वर्ष २०८०–८१को बजेटको अर्धवार्षिक समीक्षामार्फत सरकारले यस आर्थिक वर्षको राजश्व संकलनको लक्ष्य संशोधन गरेकोमा बजेट तर्जुमा गरेको समयमा सरकारले आयव्ययको अनुमान यथार्थपरक ढङ्गले गरेको नदेखिएकाले अर्थमन्त्रीको उपस्थितिमा नीतिगत छलफल हुनुपर्ने सांसदहरुको माग रहेका छ । त्यसैले सरकारले आयव्यय अनुमान गर्ने विद्यामान पद्धतिमा कमीकजोरी र प्रक्षेपणअनुसार राजश्व संकलन नभई लक्ष्य उल्लेख्य रुपमा घटाउनुको कारण, संशोधित लक्ष्यअनुसार राजश्व संकलन गर्ने अर्थ मन्त्रालयको रणनीति र कार्ययोजना आगामी वर्षहरुको लागि राजश्व संकलनको प्रक्षेपन र लक्ष्य निर्धारण गर्दा यथार्थ बनाउनको लागि अर्थ मन्त्रालयले लिएको रणनीतिको विषयमा अर्थमन्त्रीलाई बोलाएर छलफल गर्ने,भन्सार कार्यालयको अनुगमन  सम्बन्धमा उपसमिति गठन गरी आवश्यक काम कारबाही अगाडि बढाउने, मुलुकमा रहेको अन्तर्राष्ट्रिय भन्सारको विषयमा समितिले समय मिलाएर छलफल गर्ने निर्णय गरेको छ ।’

बैठकमा सांसदहरुले राजश्व वृद्धिदर घट्नुमा भन्सार चुहावट वृद्धि भएको भन्दै समितिले अनुगमन गर्नुपर्ने बताएका थिए ।