काठमाडौंः नेपाल वायुसेवा निगमले वाइडबडी जहाज (एयरबस ए३३०–२००) खरिदका लागि पहिलो किस्तावापतको करिव आठ अर्ब रुपियाँ (७९ मिलियन अमेरिकी डलर) बिहीबार अमेरिकी एए कर्पोरेशनलाई पठाउने तयारी गरेको छ ।
बुधबार नागरिक लगानी कोष र कर्मचारी सञ्चय कोषबाट ४–४ अर्ब रुपियाँ पाएपछि आजै उक्त रकम राष्ट्र बैंकबाट विदेशी मुद्रामा परिवर्तनका लागि स्वीकृति लिएको छ । निगमका प्रवन्ध निर्देशक सुगतरत्न कंसाकारले पहिलो किस्ता बुझाउने भोलि अन्तिम मिति भएकाले आवश्यक रकम पठाइने तयारी पूरा भएको बताए ।
निगमले जहाज खरिदका लागि दुवै कोषबाट नौ प्रतिशत ब्याजदरमा १२–१२ अर्ब रुपियाँको ऋण सम्झौता हालै गरेको थियो । ऋणको जमानत सरकार बसेको छ । उक्त जहाज खरिदको लागि कोषहरुले उपलब्ध गराएको क्रणको भुक्तानी अवधि १५ बर्षको राखिएको छ ।
नयाँ क्षेत्रमा उडान गर्ने निगमको व्यवसायिक योजनामा कोषले निगमलाई ऋण दिने प्रतिवद्धता जनाएको हो । यस योजनाबाट प्रत्यक्ष रुपमा आर्थिक समृद्वि, रोजगारी सिर्जना, पर्यटन क्षेत्रमा थप विकास हुने आशा गरिएको छ । ।
करिव दुई महिनाअघि निगमले वाइडबडी जहाज किन्न अमेरिकाको एएआर कर्पोरेशनसँग २४ अर्ब रुपियाँको खरिद बिक्री सम्झौता गरेको थियो । जहाज किन्न गत माघमा भएको समझदारीअनुसार निगमले बैनावापतको १० करोड रुपियाँ फागुनको पहिलो साता नै पठाइसकेको छ ।
एएआरसँग भएको सम्झौताअनुसार दुईमध्ये पहिलो जहाज आउँदो मंसिरसम्म र अर्को फागुनसम्म आइपुग्नेछ । यी जहाजबाट निगमले कोरिया, जापान, अष्ट्रेलिया, दमामको उडान सुरु गर्ने जनाइएको छ ।