काठमाडौं । चालु आर्थिक वर्षको पहिलो महिनामै नेपालले १ खर्ब १३ अर्ब रुपियाँ बराबरको व्यापार घाटा बेहोरेको छ । यो अघिल्लो आबको सोही अवधिको तुलनामा ६२ दशमलव ३५ प्रतिशतले बढी भएको भन्सार विभागको तथ्यांकमा उल्लेख छ ।
विभागकाअनुसार साउन महिनामा मात्रै नेपालमा १ खर्ब २० अर्ब रुपियाँको वस्तु तथा सेवा आयात भएको छ । एक महिनामा भएको यो आयात अघिल्लो बर्षको सोही अवधिको तुलनामा ५७ दशमलव १८ प्रतिशतले बढी हो । आयात उच्चदरमा वृद्धि हुँदा निर्यातको अवस्था भने सन्तोषजनक देखिदैन ।
समिक्षा अवधिमा नेपालले कुल ६ अर्ब ९२ करोड रुपैयाँ बराबरको मात्रै निर्यात गर्न सकेको छ । यो निर्यात अघिल्लो आवको सोहि अवधिको तुलनामा ३.१९ प्रतिशतले मात्रै बढी हो ।
साउन महिनामा नेपालले कुल १ खर्ब २७ अर्ब ५३ करोड रुपियाँको व्यापार गरेको छ । कुल वैदेशिक व्यापारमा आयातको हिस्सा ९४ दशमलव ६ प्रतिशत र निर्यातको हिस्सा ५ दशमलव ४ प्रतिशत रहेको छ । यससँगै कूल वैदेशिक व्यापारमा निर्यातको अंश ५.४२ प्रतिशतमा झरेको छ भने आयात निर्यात अनुपात १७.४ः१ पुगेको छ ।
सरकारले उत्पादन तथा निर्यात वृद्धि गर्दैै व्यापार घाटा न्यूनीकरण गर्ने नीति लिएपनि निर्यातको तुलनामा आयात वृद्धिदर उच्च हुँदा नेपालको व्यापार घाटा चुलिएको हो ।
समिक्षा अवधिमा हवाईजहाज तथा पार्टपुर्जा, पेट्रोलियम पदार्थ, फलाम तथा स्टिललगायत वस्तुको आयात उल्लेख्य वृद्धि भएको छ ।