‘व्यापार घाटा २२ खर्ब छ, जम्मा १२ खर्ब राजश्व उठ्छ, कहाँबाट देश विकास हुन्छ ?’

काठमाडौं । नेपाली काँग्रेसका नेता चन्द्र भण्डारीले देशमा भइरहेको भ्रष्टाचारलाई आगामी निर्वाचनबाट निमिट्यान्न बनाउने शक्ति निर्वाचित गर्न आवश्यक रहेको बताएका छन् । 

बिहीवार गुल्मी निर्वाचन क्षेत्र नम्बर १ ले काठमाडौंमा आयोजना गरेको कार्यक्रममा उनले नेपालको सबैभन्दा ठूलो रोग भ्रष्टाचार भएकाले आसन्न निर्वाचनबाट भ्रष्टाचारलाई निमिट्यान्न बनाउने शक्तिलाई विजयी गराउन आवश्यक रहेको बताए । 

भण्डारीले नेपालले अहिले ७ खर्ब विदेशी ऋणको ब्याज तिरिरहेको र २२ खर्ब व्यापार घाटा रहेकाले देशको अर्थतन्त्रलाई सुधार गरी बलियो बनाउने शक्तिलाई जनताले निर्वाचनबाट चुन्नुपर्ने बताए । उनले नेपाली राजनीतिमा बेइमान नेताहरु भएको बताए । 

बेइमान नेताहरुका कारण देश र देशको सौन्दर्यलाई चिन्न नसकेको भण्डारीले बताए । उनले खरको छाना हालेर बस्नेहरुलाई गरिब भनेर विस्थापित गर्ने र अहिले शहरमा खरकै छाना बनाएर करोडौं कमाइरहेको बताए । 

भण्डारीले भने, ‘हामीलाई थाहा छ, नेपालको रोग के हो ? नेपालको सबैभन्दा ठूलो रोग भ्रष्टाचार हो । अब जोसुकै होस्, जुन पार्टीको होस्, जतिसुकै ठूलो होस्, हामीले अब मंसिर ४ गते यी तत्वलाई पराजित गर्नुपर्छ । यो लुटेको सम्पत्ति नेपाल आमालाई फिर्ता गर्नुपर्छ । युवाहरुलाई विदेश पठाएर नेपालमा अवसरको खोजी नगर्ने दोस्रो रोग हो । नेपाललाई रित्तै गर्ने, जोश छैन, जाँगर छैन । यसको निधान हामीले गर्नुपर्छ ।’ 

उनले थपे, ‘आज हामी ७ खर्ब विदेशी ऋणको ब्याज तिर्दैछौँ । २२ खर्ब व्यापार घाटा छ । १२ खर्ब राजश्व उठ्छ जम्मा । कहाँबाट विकास गर्ने नेपालले । हाम्रा घरका बस्तीलाई हामीले गरिब बस्ती भनेर हेप्यौँ, तर अहिले शहरमा खरको छानोले छाएको टहरा बनाएर करोडौंको व्यापार गरिरहेका छन् । न हामीले देश चिन्यौँ, न त हाम्रो सौन्दर्य नै । हामी नेपाली भुमिका बेइमान सन्तान र नेताहरु हौँ । अब यसको अन्त्य हामीले गर्नुपर्छ  र मंसिर ४ गते बिदाइ गर्नुपर्छ ।’

नेता भण्डारीले मुलुकलाई दुरावथामा पुर्याउने नेताहरुलाई आसन्न निर्वाचनबाट बिदाई गर्नुपर्ने बताए । उनले आसन्न निर्वाचन आफूले जिते गुल्मी जिल्लालाई नमूना जिल्ला बनाउने प्रतिवद्धता व्यक्त गरे ।