बुधबार २१ कात्तिक, २०८१ | Wednesday Nov 06, 2024
काठमाडौं । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रविन्द्र मिश्रले नेकपा (माओवादी केन्द्र) पेण्डुलम पार्टी भएको बताएका छन् । राप्रपाको चुनावी सभामा शुक्रबार उनले अबको केही वर्षमा नेपालमा जम्मा ३ वटा पार्टी मात्रै बाँकी रहने दाबी पनि गरे । मिश्रले मुलरुपमा राष्ट्रिय प्रजातन्त्र पार्टी, नेकपा एमाले र नेपाली काँग्रेस पार्टी मात्रै हुने बताए ।
उनले माओवादी अबको केही वर्षभित्र पेण्डुलम बनेर एक अर्काको पछि लाग्ने वा विलय हुने बताउँदै तीन पार्टीमध्ये दुई पार्टी एमाले र काँग्रेस एउटै कित्तामा दुई नामका पार्टी मात्रै भएको बताए ।
मिश्रले यी दुवै पार्टी लगभग प्रचण्डीकरण भइसकेको उल्लेख गर्दै एमाले र काँग्रेसलाई जति गाली गरेपनि प्रचण्डपथमा नै हिँडेको बताए । उनले देशको धर्म, संस्कृति, अस्तित्व, स्वाभिमान, भुगोल, पहिचान, जाति, भाषाभाषी सबै जोगाउनुपर्ने दायित्व अब राप्रपालाई रहेको बताए ।
उनले आसन्न निर्वाचनबाट राप्रपाले प्रगतिशील जगमा देशलाई रुपान्तरण गर्ने बताए । मिश्रले भने, ‘यो देशमा अबको केही वर्षमा जम्मा ३ वटा पार्टी रहन्छ । मुल रुपमा राष्ट्रिय प्रजातन्त्र पार्टी, नेकपा एमाले र नेपाली काँग्रेस । माओवादी पेण्डुलम जस्तो यता र उती गर्छ, की त्यो विलय हुन्छ, की त्यो साँघुरिएर बस्छ । त्यस बाहेक अर्को क्षेत्रीय र अन्य दलहरु सानो सानो अवस्थामा रहन्छन् । तीन वटामा दुई वटा पार्टी एमाले र काँग्रेस एउटै कित्तामा भएका दुई नामका पार्टी मात्रै हुन् । एउटै कित्ताका पार्टी हुन् । किनभने यी दुवै पार्टीको लगभग प्रचण्डीकरण भइसक्यो । जति गाली गरेपनि प्रचण्डीकरण भइसक्यो । त्यही बाटोमा हिँडेका छन् । अर्को नरम संवद्र्धनवादी धारमा त्यो निरन्तरतासहितको गतिशील राजनीति भनेर जुन राप्रपाले भन्दै आएको छ, त्यो निरन्तरता भनेको यो देशको धर्म जोगाउने, संस्कृति, अस्तित्व, स्वाभिमान, भुगोल जोगाउनु हो । यो देशको पहिचान, जाति, भाषाभाषी सबै जोगाउनुपर्यो । त्यो जगमा प्रगतिशील हुनुहुन्छ । त्यो जगमा यो देशलाई रुपान्तरण गर्नुपर्यो भन्ने धार राप्रपाले जुन बोकेको छ, त्यो धार कहिले पनि मर्दैन ।’
काठमाडौं क्षेत्र नम्बर १ मा राप्रपाबाट प्रतिनिधि सभा सदस्यको उम्मेदवारसमेत रहेका वरिष्ठ उपाध्यक्ष मिश्रले काँग्रेस नेता स्व. गणेशमान सिंहको राजनीतिको उत्तराधिकारी आफू भएको दाबी समेत गरे । उनले संघीयता देशको लागि उपयुक्त नभएको उल्लेख गर्दै संघीयतालाई जतिसक्दो चाँडो खारेज गर्नुपर्ने बताए ।
