शनिबार २४ कात्तिक, २०८१ | Saturday Nov 09, 2024
काठमाडौं । पशुपतिनाथ मन्दिरमा विदेशी तथा आन्तरिक पर्यटकहरुको चहल पहल बढेको छ । विगतका दैनिक एकदेखि दुई सय धार्मिक पर्यटक आउने यस मन्दिरमा अहिले दैनिक तीनदेखि पाँच सयसम्म पर्यटक आउने गरेको पशुपति क्षेत्र विकास कोषले दावी गरेको छ ।
कोषका कार्यकारी निर्देशक घनश्याम खतिवडाले पशुपतिनाथ मन्दिर दर्शन गर्न आउने विदेशी पर्यटकहरुको संख्या दोब्बरले वृद्धि भएको दावी गरे । उनले आन्तरिक पर्यटकहरुको संख्या पनि बढेको बताए । विशेषगरी कोरियाली, चिनियाँ, यूरोपियनहरु बढिरहेको खतिवडाको भनाई छ ।
उनले भने, ‘पशुपतिनाथ मन्दिर हेर्न आउने पर्यटकहरुको संख्या बढ्दो क्रममा छ । त्यसैले हामीले पशुपति क्षेत्रमा गाइड गर्ने गाइडहरुलाई तालिम दिने तयारी गरेका छौं । नयाँ गाइडहरुलाई र भइरहेका गाइडहरुलाई पनि तालिम दिने योजना छ । उनीहरुलाई पशुपतिनाथको बारेमा बताउनसक्ने बनाउने छौं ।’
मन्दिरमा साधुसन्तहरुको संख्या पनि बढ्नुपर्नेमा अपेक्षाकृत बढ्न नसकेको खतिवडाले स्वीकार गरे ।
