शुक्रबार २३ कात्तिक, २०८१ | Friday Nov 08, 2024
काठमाडौं । राष्ट्रिय प्रजातन्त्र पार्टी (राप्रपा)ले पृथ्वी जयन्ती तथा राष्ट्रिय एकता दिवसको दिन पुस २७ गते भृकुटीमण्डपमा चियापान कार्यक्रम आयोजना गरेको छ ।
उक्त दिन नेपाल निर्माता पृथ्वीनारायण शाहको सिंहदरबार अगाडिको शालिकसम्म ऱ्याली र भृकुटीमण्डपमा चियापान कार्यक्रम गर्ने निर्णय राप्रपाले गरेको हो । यस बर्ष पुथ्वीनारायण शाहको ३०२औँ जन्मजयन्ती हो । कार्यक्रममा सबै गणतन्त्रवादी नेताहरुलाई पनि बोलाउने तयारी राप्रपाले गरेको छ ।
राप्रपाका प्रवक्ता मोहनकुमार श्रेष्ठले कार्यक्रममा प्रधानमन्त्री, मन्त्रीहरु, विभिन्न राजनीतिक दलका नेता, कूटनीतिक तथा संवैधानिक निकायका प्रतिनिधि, धार्मिक सङ्घ सङ्गठन, उद्योगी, व्यावसायी, विभिन्न पेशाकर्मी, बुद्धिजीवीलगायत आठ हजारलाई निमन्त्रणा गरिएको जानकारी दिए ।
राप्रपाले विभिन्न राज्यलाई एकीकृत गरी आधुनिक नेपाल निर्माणमा योगदान गरेका राष्ट्र निर्माताको सम्मानमा हुने चियापान समारोहमा विशिष्ट व्यक्तिहरु सहभागी हुनेछ भन्दै सोही दिन आफ्नो पार्टीले सिंहदरबारस्थित शालिकमा माल्यार्पण कार्यक्रम गर्ने बताएको छ । भृकुटीमण्डपमा भेला भइ अध्यक्ष राजेन्द्र लिङ्देनको नेतृत्वमा भद्रकाली हॅुदै सिंहदरबार अगाडि रहेको पृथ्वी शालिकसम्म ऱ्याली र शालिकमा माल्यार्पण हुनेछ।
श्रेष्ठका अनुसार पार्टीले सोही दिनलाई राष्ट्रिय एकता दिवसका रुपमा केन्द्र र स्थानीय तहमा पृथ्वीनारायण शाहको व्यक्तित्व तथा इतिहास झल्काउने गरी सभा गोष्ठी, शुभकामना आदानप्रदान तथा चियापान समारोह, अन्तरक्रिया, दीपावलीलगायत कार्यक्रम गरी उत्सवका रुपमा मनाउन पार्टी मातहतका सबैलाई सर्कुलर गरिएको छ । जिल्लामा हुने कार्यक्रमलाई प्रभावकारी बनाउन केन्द्रीय प्रतिनिधिलाई जिल्ला खटाइएको छ।
प्रवक्ता श्रेष्ठका अनुसार सोही दिन ‘पृथ्वीनारायण’ शीर्षकमा कविता लेखन प्रतियोगिताको नतिजा प्रकाशन गरी पहिलो, दोस्रो र तेस्रोलाई क्रमशः रु एक लाख, रु ५० हजार र रु २५ हजार तथा सान्त्वना विजेता तीन जनालाई प्रतिव्यक्ति रु १० हजार पुरस्कार प्रदान गरिनेछ । पृथ्वीजयन्तीलाई एकता दिवस र उत्सवका रुपमा देशभर मनाउन पार्टी अध्यक्ष राजेन्द्र लिङ्देनको नेतृत्वमा मूल समारोह समिति समेत गठन गरिएको छ ।
