शेयर कारोबारबाट सरकारले उठायो चार अर्ब १५ करोड पुँजीगत लाभकर

काठमाडौं ।  चालु आर्थिक बर्ष २०८०–८१ को १० महिनामा शेयर कारोबारबाट चार अर्ब १५ करोड ३० लाख ४१ हजार रुपियाँ राजश्व संकलन भएको छ । सीडीएस एन्ड क्लियरिङ लिमिटेडले उपलब्ध गराएको बैशाख मसान्तसम्मको तथ्यांकअनुसार शेयर कारोबार गर्दा हुने नाफाबाट लगानीकर्ताले सो बराबरको पुँजीगत लाभकर तिरेका हुन । 

त्यसमा बैशाखमा मात्रै ३६ करोड २७ लाख ४२ हजार रुपियाँ यस्तो कर उठेको छ । बैशाखमा संस्थागत पुँजीगत लाभकर ६ करोड ४० लाख नौ हजार रुपियाँ उठेको छ । यसैगरि व्यक्तिगत तर्फ दीर्घकालिन पुँजीगत लाभकर ११ करोड ४३ लाख ७१ हजार रुपियाँ र अल्कालिन पुँजीगत लाभकर १८ करोड ४३ लाख ६१ हजार रुपियाँ उठेको तथ्यांकमा उल्लेख छ । 

बैशाखसम्म उठेको पुँजीगत लाभकर गत आवको सोही अवधीको तुलनामा १०१।४ प्रतिशतले बढी हो । गत आवको सोही अवधीमा दुई अर्ब ६ करोड २० लाख १५ हजार रुपियाँ यस्तो कर उठेको थियो । गत आर्थिक बर्षभरीमा भने दुई अर्ब ९७ करोड पाँच लाख रुपियाँ पुँजीगत लाभकर उठेको सीडीएससीको तथ्यांकमा उल्लेख छ ।

विशेषगरि गत आवको तुलनामा शेयर बजारमा सामान्य सुधार आउँदा पुँजीगत लाभकर पनि बढेको बताइन्छ । यो बर्ष बीच बीचमा नेपाल स्टक एक्सचेन्ज लिमिटेड (नेप्से) परिसुचक बढ्ने गरेको छ । कारोबार रकम पनि गत आवको तुलनामा बढी छ । यी यस्ता कारण शेयर कारोबारबाट उठ्ने कर बढेको जानकारवालाहरु बताँउछन् । 

यो बर्ष साउनमा ४० करोड आठ लाख रुपियाँ, भदौमा १४ करोड ६९ हजार रुपियाँ, असोजमा २१ करोड ९५ लाख रुपियाँ र कात्तिकमा आठ करोड ४१ लाख रुपियाँ पुँजीगत लाभकर उठेको छ । दशैं तिहार जस्ता पर्वका कारण कात्तिकमा धेरै सार्वजनिक विदा थियो । त्यस कारण कात्तिकमा कारोबार दिन कम हुँदा राजश्व पनि कम उठेको बताइन्छ । 

यसैगरि, मंसिरमा ३० करोड ५३ लाख रुपियाँ, पुसमा ७४ करोड ३९ रुपियाँ, माघमा ९७ करोड २० लाख रुपियाँ, फागुनमा ४४ करोड ९ लाख रुपियाँ र चैतमा ४८ करोड ३४ लाख रुपियाँ लाभकर उठेको थियो । अहिले बैशाखमा भने ३६ करोड २७ लाख ४२ हजार रुपियाँ यस्तो कर उठेको छ । गत चैतको तुलनामा भने बैशाखमा शेयर कारोबारबाट उठ्ने राजश्वमा कमी आएको छ । 

यसअघि आव २०७६–७७ मा ९८ करोड ५२ लाख रुपियाँ मात्रै यस्तो कर उठेको थियो । तर, कोरोना नियन्त्रण गर्न लगाइएको लकडाउनपछि शेयर बजार बढ्न थाल्यो । त्यसबेला नेप्से परिसुचक ३२ सय विन्दुसम्म पुगेको थियो । सोहीक्रममा २०७७–७८ मा १४ अर्ब १३ करोड ६१ लाख रुपियाँ र आव २०७८–७९ मा १० अर्ब ३५ करोड ३० लाख रुपियाँ यस्तो कर उठेको थियो । पछि शेयर बजार घटेसँगै गत आवमा त्यो कर दुई अर्ब ९७ करोड ५ लाख रुपियाँमा सीमित भएको थियो । चालु आवमा भने त्यो पुनः बढ्दै गएको छ ।