शुक्रबार २ कात्तिक, २०८१ | Friday Oct 18, 2024
काठमाडौं । सूर्योदय वोमी लघुवित्तले संस्थापक समूहअन्तर्गत एनआईसी एसिया बैंकको स्वामित्वमा रहेको संस्थापक शेयर बिक्रीमा ल्याएको छ ।
संस्थाले आज (आइतबार) देखि बैंकको नाममा रहेको ६१ हजार ८०५ कित्ता संस्थापक शेयर बिक्रीमा ल्याएको हो ।
प्रतिकित्ता न्यूनतम मूल्य ३४८ रुपियाँ तोकिएको यो शेयर विद्यमान संस्थापक वा जोकोही व्यक्ति, कम्पनी, संघसंस्थाले खरिद गर्न पाउनेछन् । खरिद गर्दा न्यूनतम पाँच हजार कित्ता र अधिकतम सबै कित्ताका लागि आवेदन दिन सकिनेछ ।
शेयर खरिद गर्न इच्छुकले साउन १३ गतेभित्र आफूले खरिद गर्न चाहेको शेयर विवरण खुलाई बोलकबोलमार्फत गोप्य शिलबन्दी बोलपत्र आवेदन पेस गर्नुपर्नेछ ।
साथै, संस्थाले यसअघि नै संस्थापक शेयरधनीले मात्रै खरिद गर्न पाउने गरी बिक्री खुला गरेको थियो । तोकिएको समयभित्र आवेदन नपरेपछि सर्वसाधारणका लागि बिक्री खुला गरिएको जनाएको छ ।
बोलपत्र एनआईसी क्यापिटल लिमिटेड, ट्रेड टावर, थापाथली काठमाडौं वा एनआईसी बैंकको कर्पोरेट कार्यालय तथा शाखा कार्यालय विराटनगर मोरङ, आदर्शनगर वीरगन्ज, महेन्द्रपुल पोखरा, श्रवणपथ बुटवल, हस्पिटल लाइन धनगढी र वीरेन्द्रनगर सुर्खेतमा पेस गर्न सकिनेछ ।
बोलपत्र फाराम पनि सोही स्थानमा पाइनेछ ।
