दसैंतिहारमा सुकिला नोट नपाइने, पुरानैबाट काम चलाउन राष्ट्र बैंकको आग्रह

काठमाडौं । नेपाल राष्ट्र बैंकले यसवर्ष दसैंतिहार लक्षित सुकिला नोट बजारमा नपठाउने भएको छ । 

अघिल्ला वर्षहरुमा मुख्य चाडपर्वकै लागि भनेर तीन चार महिनाअघि नै नोट छपाई गर्ने गरेको केन्द्रीय बैंकले यसपटक सो कार्य रोकेको हो ।

‘कुनै पनि वर्ष राष्ट्र बैंकले दसैतिहारकै लागि भनेर नयाँ नोट छाप्दैन । नोट छपाईको आफ्नै नीति अनि समय हुन्छ । ३ देखि ५ वर्षको अवधिमा कुनै अंकको नोट छाप्ने गरिन्छ । दसैंतिहारकै अघि नोट छाप्ने अनि रिसाइक्लिङ (पुनः छपाई) हुने हुँदा बजारले माग गरे अनुसारको सुकिला नोट पाउने गरेका थिए । तर यसपटक पुरानै नोटलाई निरन्तरता दिने नीति राष्ट्र बैंकले लिएको छ’ पोखरेलले कर्पोरेट नेपालसँग भने । 

पुराना नोट रिसाइकल छपाई गर्दा खर्च आउने हुँदा पनि काम चल्नेसम्मका नोटहरुलाई प्रयोग गर्ने योजना बनाएको सहप्रवक्ता पोखरेलको भनाइ छ । जसले गर्दा यसपटक बजारमा नयाँ नोटको अभाव हुने भएको छ । सुकिला नोटको अभावलाई ध्यानमा राख्दै सकेसम्म पुरानै नोटबाट काम चलाउन समेत उनले सबैमा आग्रह गरेका छन् । 

६० देखि ७० अर्ब सुकिला नोटको माग

दसैंतिहार तथा छठ जस्ता मुख्य चाडपर्वको अवसरमा बजारमा ६० देखि ७० अर्ब रुपियाँ बराबरको सुकिला नयाँ नोटको माग हुने गरेको छ । जुन राष्ट्र बैंकले प्रत्येक महिना सार्वजनिक गर्ने गरेको क्यास सर्कुलेसन (नगद प्रवाह) रिपोर्टबाट पनि देखिन्छ । 

तुलनात्मक रुपमा अन्य समय भन्दा दसैंतिहारको समयमा बजारको क्यास सर्कुलेशन ६०–७० अर्ब बढीले बजारमा गएको देखिन्छ । तर, पछि सो पैसा बैंकिङ च्यानलमा नै फर्किन्छ । पछिल्लो समय बजारमा ६ खर्ब ६८ अर्ब रुपियाँको हाराहारी क्यास सर्कुलेसन छ ।