शनिबार ५ असोज, २०८१ | Saturday Sep 21, 2024
दाङ । लमही नगरपालिका–९ रिहार निवासी ५७ वर्षीया सम्झना चौधरीले कुचोबाट आफ्नो जीविकोपार्जन गर्दै आएकी छन् । उनले कुचो बनाउने र बजारमा चामलसँग साटेर घर खर्च चलाउने गर्छिन
‘कुचो बनाएर घोराही बजार लैजान्छु, धेरैले चामल दिनुहुन्छ’, चौधरीले भनिन, ‘कुचो बेचेर÷साटेर सङ्कलन भएको चामल तथा रकमले जीविकोपार्जन भइरहेको छ ।’ सिरुको कुचो बनाउने गरेको भन्दै उनले यसको बजारमा माग पनि धेरै रहेको बताइन् ।
बजारमा माग भएकाले पछिल्लो एक वर्षदेखि कुचो बनाएर बिक्री गर्ने, चामलसँग साट्ने गरेको चौधरीले बताइन् । उनले भनिन्, ‘एउटा कुचोबापत दुई मानासम्म चामल दिने गर्नुहुन्छ । नगदभन्दा चामलसँग बढी कारोबार हुने गरेको छ ।’
चार सन्तानकी आमा सम्झनाले छोराछोरीको बिहेपछि आफू घरमा एकै रहेको बताइन् । एक पटकमा ५० वटासम्म कुचो बनाएर बिक्री गरेपछि त्यसबाट भएको आम्दानीले दुई महिनासम्म घर खर्च चलाउन पुग्ने उनको भनाइ छ । ‘काचो सिरु ल्याएर त्यसबाट कुचो बनाउछौँ, त्यही कुचो सुकेपछि बेच्छौँ’, चौधरीले भनिन् ।
सिरुको कुचो बजारमा पाइने कुचोभन्दा राम्रो हुने भएकाले धेरैले माग गर्ने भन्दै उनले यो पेसालाई निरन्तरता दिने बताइन् । ‘उमेर पनि गइसक्यो, अरु काम गर्न सकिदैन’, उनले भनिन, ‘कुचो बिक्री हुँदासम्म यही पेसालाई निरन्तरता दिनेछु ।’ काम सानो वा ठूलो नहुने भन्दै महिला आत्मनिर्भर हुन आर्थिकस्तर सुधार गर्नुपर्नेमा चौधरीले जोड दिइन् ।
