मनास्लु हिमालको रोप फिक्सिङ सम्पन्न भएसँगै छ जनाले गरे सफल आरोहण

काठमाडौं । शरद ऋतुका लागि मनास्लु हिमालको रोप फिक्सिङ सम्पन्न भएको छ । 

यस सिजनको लागि मनास्लु हिमालको चुचुरोसम्मको लागि रोप फिक्सिङको जिम्मेवारी सेभेन समिट ट्रेक कम्पनीले पाएको थियो । एक्सपिडिसन अपरेटर्स एसोसिएसन नेपाल (इओए–नेपाल) अन्तर्गत मनास्लु हिमालमा रोप फिक्सिङ (डोरी टाग्ने) को जिम्मेवारी शरद ऋतुको लागि दिइएको थियो । 

आज दिउँसो साढे ३ः३० बजे सेभेन समिट ट्रेक कम्पनीका रोप फिक्सिङ टिमका छ जना शेर्पाले मनास्लु हिमालको चुचुरोसम्मको रोप फिक्सिङ गरी यस शरद ऋतुका लागि मनास्लु हिमाल आरोहणको लागि खुल्ला गरिएको मनास्लु हिमालको रोप फिक्सिङका को–लिडर लाक्पा शेर्पा (मकालु लाक्पा) ले जानकारी दिए ।

पर्यटन विभागबाट हाल मनास्लुसहित १० वटा हिमालका लागि परमिट (आरोहण अनुमति) लिएका छन् । गत वर्षको सिजनमा मनास्लु हिमाल आरोहणका लागि ३०१ जनाले आरोहण अनुमति लिएका थिए भने यस पटक विश्वको ८औं अग्लो हिमाल मनास्लुको लागि मात्रै ३ सय ८ जनाले आरोहण अनुमति लिएका छन् । 

पर्यटन विभागका साहसिक पर्यटन तथा पर्वतारोहण शाखाका निर्देशक राकेश गुरुङका अनुसार शरद ऋतुका लागि मनास्लु, पुथा हिउचुली, अन्नपूर्ण–४, ठकर गो इस्ट, धौलागिरी, फुङ्गी, कुम्भकर्ण, अरनिको चुली, आपि र मकालु गरी १० वटा हिमालहरुको लागि आरोहण अनुमति दिइएको छ । १० वटा हिमाल आरोहणको लागि २ सय ७४ जना पुरुष र ८८ जना महिला गरी ३ सय ६२ जनाले आरोहणको लागि अनुमति लिएको उनले जानकारी दिए । 

उनले भने, ‘१० वटा हिमाल आरोहणको लागि ५४ वटा देशका नागरिकहरुले आरोहण अनुमति लिएका हुन् । चीनका नागरिक, अमेरिका, रुस, बेलायत, जापान, जर्मनी, काजाकिस्तान, भारतबाट हिमाल आरोहण अनुमति लिने धेरै रहेका छन् ।’ उनीहरूबाट सरकारले ४ करोड ५२ लाख ४५ हजार ८ सय ४८ रुपियाँ संकलन गरेको छ ।